នៅថ្ងៃទី៣០ ខែកញ្ញា រដ្ឋមន្ត្រីសេដ្ឋកិច្ចតៃវ៉ាន់លោកស្រី Wang Mei-hua ប្រាប់ទីភ្នាក់ងារ Reuters ថា ប្រសិនបើចិនចូលជាសមាជិកកិច្ចព្រមព្រៀងគ្រប់ជ្រុងជ្រោយ និងវឌ្ឍនភាពនៃភាពជាដៃគូអន្តរប៉ាស៊ីហ្វិក (CPTPP) មុនតៃវ៉ាន់ នោះចិននឹងរារាំងតៃវ៉ាន់ជាក់ជាមិនខាន។ លោកស្រី Wang លើកឡើងថា ប្រព័ន្ធគ្រប់គ្រងប្រទេសរបស់ចិនមិនត្រូវជាមួយបទបញ្ញត្តិតឹងរ៉ឹង និងស្ដង់ដារខ្ពស់របស់កិច្ចព្រមព្រៀង CPTPP ឡើយ។
ក្នុងខែកញ្ញា ទាំងកោះតៃវ៉ាន់ និងចិនបានដាក់ពាក្យស្នើចូលជាសមាជិកកិច្ចព្រមព្រៀងពាណិជ្ជកម្ម CPTPP ។ ប៉ុន្តែចិនចេញមុខជំទាស់បេក្ខភាពរបស់តៃវ៉ាន់ ក្រោមហេតុផលថា តៃវ៉ាន់ស្ថិតក្រោមការគ្រប់គ្រងរបស់ខ្លួន។
តៃវ៉ាន់វិញ ក៏ហាក់បារម្ភចេតនារបស់ចិនដែរក្នុងករណីចិនក្លាយជាសមាជិកមុនខ្លួននោះ។ ក្នុងកិច្ចសម្ភាសថ្ងៃទី៣០ ខែកញ្ញា ជាមួយទីភ្នាក់ងារព័ត៌មាន Reuters រដ្ឋមន្ត្រីសេដ្ឋកិច្ចតៃវ៉ាន់លោកស្រី Wang Mei-hua បានលើកឡើងថា៖ «ប្រសិនបើចិនចូលជាសមាជិកមុន នោះ ច្បាស់ណាស់ដែលពួកគេនឹងរារាំងតៃវ៉ាន់»។
លោកស្រី Wang ក៏ចោទជាសំណួរទាក់ទងលក្ខណៈសម្បតិ្តរបស់ទីក្រុងប៉េកាំងក្នុងកិច្ចព្រមព្រៀងពាណិជ្ជកម្មសេរីដ៏ធំនៅអាស៊ីប៉ាស៊ីហ្វិក ដោយបានលើកយកបញ្ហារបស់ចិនដូចជាការត្រួតពិនិត្យលើប្រព័ន្ធអ៊ីនធឺណិតដ៏តឹងរ៉ឹងដោយរដ្ឋាភិបាល និងបញ្ហាសិទ្ធិការងារជាដើម។ រដ្ឋមន្ត្រីរូបនេះក៏សង្កត់ធ្ងន់ថា តម្រូវការរបស់កិច្ចព្រមព្រៀងពាណិជ្ជកម្ម CPTPP មិនស៊ីគ្នាជាមួយប្រព័ន្ធគ្រប់គ្រងជាមូលដ្ឋានរបស់ចិនឡើយ។
«ប្រសិនបើចិនកែប្រែប្រព័ន្ធទាំងនោះ បន្ទាប់មកចូលជាសមាជិក នោះវាមិនមែនជារឿង អាក្រក់នោះទេ។ ប៉ុន្តែប្រសិនបើប្រព័ន្ធនោះមិនផ្លាស់ប្ដូរ តើពួកគេចូលជាសមាជិក CPTPP បានយ៉ាងដូចម្ដេច? នេះជាបញ្ហាមួយដែលខ្ញុំពិតជាមិនយល់នោះទេ។» មន្រ្តីតៃវ៉ាន់លើកសំណួរបែបនេះ។
ការលើកឡើងបែបនេះ ចង់សំដៅលើប្រព័ន្ធគ្រប់គ្រងទូទៅ និងសេដ្ឋកិច្ចរបស់ចិនដែល អនុវត្តតាមប្រព័ន្ធសង្គមនិយម សេរីភាពមិនពេញលេញ រីឯប្រព័ន្ធទីផ្សារមានការជ្រៀតជ្រែកពីរដ្ឋាភិបាល។ ផ្ទុយទៅវិញ កិច្ចព្រមព្រៀងពាណិជ្ជកម្ម CPTPP បានកំណត់ទីផ្សារសេរី។
គួរបញ្ជាក់ថា នៅក្នុងឆ្នាំ ២០១៨ កិច្ចព្រមព្រៀងដៃគូអន្តរប៉ាស៊ីហ្វិក ត្រូវបានធ្វើវិសោធនកម្ម ទៅជាកិច្ចព្រមព្រៀងគ្រប់ជ្រុងជ្រោយនិងវឌ្ឍនភាពនៃភាពជាដៃគូអន្តរប៉ាស៊ីហ្វិក បន្ទាប់ពីការដើរចេញរបស់អាម៉េរិក។ ក្នុងកិច្ចព្រមព្រៀងនេះ ប្រទេសជាសមាជិកមានចំនួន ១១ ប្រទេសដូចជាអូស្ត្រាលី, ព្រុយណេ, កាណាដា, ស៊ីលី, ជប៉ុន, ម៉ាឡេស៊ី, ម៉ិកស៊ិក, នូវែលសេឡង់, ប៉េរូ, សិង្ហបុរី និងវៀតណាម៕