១. យន្តហោះចម្បាំង F-35 Lightning II របស់អាម៉េរិក

 

យន្តហោះចម្បាំង F-35 Lightening II គឺជាយន្តហោះចម្បាំងដ៏ទំនើបមួយ ដែលត្រូវបានអភិវឌ្ឍដោយក្រុមហ៊ុន Lockheed Martin។ យន្តហោះចម្បាំងនេះ មាន ៣ប្រភេទ គឺ F-35A, F-35B និង F-35C។ អាម៉េរិក បានចំណាយថវិកាច្រើនជាង ១,៥ទ្រីលានដុល្លារ ដើម្បីអភិវឌ្ឍបច្ចេកវិទ្យាជំនាន់ទី៥ មួយនេះ។ 

 យន្តហោះចម្បាំង F-35 Lightning II របស់អាម៉េរិក។ រូបភាព៖ Aerocorner
 

យន្តហោះចម្បាំង F-35 Lightening II ត្រូវបានបំពាក់ដោយមួយ និងកៅអីសម្រាប់អ្នកបើកបរមួយ។ យន្តហោះចម្បាំងប្រភេទនេះ អាចបើកបរបានគ្រប់កាលៈទេសៈទាំងអស់ ពោលគឺមិនថាមានភ្លៀង ឬអាកាសធាតុអ្វីក៏ដោយ និងអាចហោះបានជាង ១៩០០គីឡូម៉ែត្រក្នុងមួយម៉ោង។ វាក៏មានបំពាក់បច្ចេកវិទ្យាមួយ ដើម្បីជំនួយដល់អ្នកបើកបរ ដើម្បីវាយប្រហារសត្រូវ, ប្រមូលទិន្នន័យ និងបំពាក់អាវុធបានជាច្រើនប្រភេទផងដែរ។ 

 

បច្ចុប្បន្ន ប្រទេសចំនួន ៦ បានបញ្ជាទិញយន្តហោះចម្បាំងដ៏ទំនើបមួយនេះ ក្នុងនោះរួមមាន អ៊ីស្រាអែល សិង្ហបុរី ជប៉ុន កូរ៉េខាងត្បូង បែលហ្ស៊ិក និងបូឡ៉ូញជាដើម។ យន្តហោះចម្បាំងជំនាន់ទី៥ នេះ មានតម្លៃប្រមាណជាង ៧០លានដុល្លារ។ 

 

២. យន្តហោះចម្បាំង Chengdu J-20 របស់ចិន
 

Chengdu J-20 គឺជា​យន្តហោះ​ចម្បាំង​របស់​ចិន ដែល​ត្រូវបាន​ផលិត​ដោយ​ក្រុមហ៊ុន Chengdu Aerospace Corporation។ យន្តហោះចម្បាំងប្រភេទនេះ ត្រូវបានបំពាក់ម៉ាស៊ីន​ពីរ ដែលមាន​កម្លាំង​ខ្លាំង អាច​ហោះហើរ​បាន​គ្រប់​អាកាសធាតុ។ មិនខុសពីយន្តហោះចម្បាំង F-35 Lightening II របស់អាម៉េរិកឡើយ យន្តហោះ J-20 របស់ចិន គឺជាយន្តហោះជំនាន់ទី ៥ ​និងមានតែ​កៅអី​មួយ​ប៉ុណ្ណោះ។ 

 យន្តហោះចម្បាំង Chengdu J-20 របស់ចិន។ រូបភាព៖ Xinhua

J-20 អាច​ហោះ​បាន ២៤៦៩ ​គីឡូម៉ែត្រ​ក្នុង​មួយ​ម៉ោង​ និងអាច​បាញ់​មី​ស៊ី​ល​លើ​អាកាស បាន​ចម្ងាយ​រហូតដល់ ៣០០​គីឡូម៉ែត្រ និង ៤០០​គីឡូម៉ែត្រ​ពី​អាកាស​ទៅ​ដី។ យន្តហោះជំនាន់ចុងក្រោយរបស់ចិនមួយនេះ មានតម្លៃប្រមាណ ១០០លានដុល្លារក្នុងមួយគ្រឿង។ យន្តហោះប្រភេទនេះ បានបំពាក់ម៉ាស៊ីន Shenyang WS-15 Turbofan។ 

 

៣. យន្តហោះចម្បាំង Sukhoi Su-57 របស់រុស្ស៊ី

 

យន្តហោះចម្បាំង Sukhoi Su-57 គឺជាយន្តហោះចម្បាំងជំនាន់ទី៥ ដែលមានសមត្ថភាពកំបាំងខ្លួនពីរ៉ាដារបស់សត្រូវ និងត្រូវបានអភិវឌ្ឍសម្រាប់កម្លាំងទ័ពអាកាសរបស់រុស្ស៊ី។ យន្តហោះចម្បាំងមួយគ្រឿងនេះ ត្រូវបានបំពាក់ដោយម៉ាស៊ីន Izdeliye 117 ឬ AL-41F1។ ទន្ទឹមនេះ Sukhoi Su-57 អាចបំពាក់មីស៊ីលវាយប្រហារលើតំបន់អាកាសបានចំនួន ៤, មីស៊ីលចម្ងាយខ្លីចំនួន ២ និងមីស៊ីលផ្សេងទៀតបានផងដែរ។ 

 យន្តហោះចម្បាំង Sukhoi Su-57 របស់រុស្ស៊ី។ រូបភាព៖ Handout

ល្បឿនយន្តហោះចម្បាំងប្រភេទនេះ អាចហោះបាន ២១២១គីឡូម៉ែត្រ ក្នុងមួយម៉ោង និងហោះបាន ៣៥១៩គីឡូម៉ែត្រ។ យន្តហោះរបស់រុស្ស៊ីមួយនេះ មានតម្លៃប្រមាណ ៤២លានដុល្លារ។ 

 

៤. យន្តហោះ Dassault Rafale របស់បារាំង

 

Rafale គឺជា​យន្តហោះ​ចម្បាំង ដែល​ត្រូវបាន​ផលិត​ដោយ​ក្រុមហ៊ុន​បារាំង Dassault Aviation​។ យន្តហោះ​ចម្បាំង​នេះ ត្រូវបាន​គេ​ផលិតឡើង​មាន​ចំនួន ៣​ប្រភេទ ក្នុងនោះ​មានដូចជា Rafale C, Rafale B និង Rafale M។ Rafale ត្រូវបាន​បំពាក់ ដោយ​ម៉ាស៊ីន​ពីរ M88-2 ដើម្បី​ធ្វើ​ឲ្យ​ប្រព័ន្ធ​ដំណើរការ​យន្តហោះ​ខ្លាំង និង​មាន​ល្បឿន​លឿន​។ 

 យន្តហោះ Dassault Rafale របស់បារាំង។ រូបភាព៖ Dassault Aviation

យន្តហោះ​ជំនាន់​ថ្មី​នេះ អាច​បំពាក់​មី​ស៊ី​លបាញ់​លើ​អាកាស មី​ស៊ី​លបាញ់​ទៅ​ដី និង​មី​ស៊ី​ល​ប្រឆាំង​នាវាចម្បាំង​។ យន្តហោះ​ចម្បាំង​ប្រភេទ​នេះ ក៏​អាច​បំពាក់​កាំភ្លើង​ទំហំ ៣០​មី​លី​ម៉ែត្រ​បានដែរ​។ ជាពិសេស វា ក៏​អាច​បំពាក់​មី​ស៊ី​ល​បាន​ចំនួន ៦​គ្រាប់ ដោយ​អាច​បាញ់​បាន​ក្នុងពេល​ជាមួយគ្នា​។ Rafale អាច​បាញ់​មី​ស៊ី​ល​នៅលើ​អាកាសបាន​ចម្ងាយ​រហូតដល់ ១៥០​គីឡូម៉ែត្រ និង​បាញ់​ទៅ​ដី​បាន​រហូតដល់ ៣០០​គីឡូម៉ែត្រ​។

 

បន្ថែម​ពីលើ​នេះ Rafale អាច​ហោះហើរ​បាន​គ្រប់​កាលៈទេសៈ ពោលគឺ​មិន​ថាស្ថិតក្នុង​អាកាសធាតុ​ដ៏អាក្រក់​។ ម្យ៉ាងវិញទៀត វា​អាច​ហោះហើរ​បាន​យ៉ាង​ល្អ​, មាន​រ៉ា​ដា និង​ប្រព័ន្ធ​គ្រឿង​ម៉ាស៊ីន​ដ៏​ល្អ​មួយ បើ​ធៀប​នឹង​យន្តហោះ​ចម្បាំង​ផ្សេងទៀត​។ Rafale អាច​ហោះ​បាន​ចម្ងាយ ៣៧០០​គីឡូម៉ែត្រ​, ហោះ​បាន​កម្ពស់​ជាង ១៥​គីឡូម៉ែត្រ និង​អាច​ផ្ទុក​ទម្ងន់ ២៤៥០០​គីឡូក្រាម​។ ចំណែក​ល្បឿន​វិញ Rafale អាច​ហោះ​បាន ២២២២​គីឡូម៉ែត្រ​ក្នុង​មួយ​ម៉ោង​។ វាមានតម្លៃប្រមាណ ១២០លានដុល្លារ ក្នុងមួយគ្រឿង។ 

 

៥. យន្តហោះចម្បាំង Eurofighter Typhoon របស់អង់គ្លេស
 

Eurofighter Typhoon របស់អង់គ្លេស គឺជាយន្តហោះចម្បាំងជំនាន់ទី ៤ និងត្រូវបានអភិវឌ្ឍរួមគ្នាដោយក្រុមហ៊ុន Airbus, ក្រុមហ៊ុន BAE Systems និងក្រុមហ៊ុន Leonardo។ វា​ជាប្រភេទយន្តហោះចម្បាំងដ៏ទំនើបមួយ ដែលត្រូវបានផលិតឡើងនៅអឺរ៉ុប។ Eurofighter Typhoon ត្រូវបានបំពាក់ដោយមុខងារទំនើបៗ ប្រព័ន្ធការពារដ៏ខ្លាំង និងសមត្ថភាពដ៏ល្អក្នុងពេលប្រតិបត្តិការ។

យន្តហោះចម្បាំង Eurofighter Typhoon ត្រូវបានបំពាក់ដោយម៉ាស៊ីន Eurojet EJ200។ វាមានល្បឿន ២១២៤ គីឡូម៉ែត្រ ក្នុងមួយម៉ោង និងអាចធ្វើដំណើរបាន ៣៧៩១គីឡូម៉ែត្រ។ Eurofighter Typhoon អាចហោះបានកម្ពស់ជាង ១៩គីឡូម៉ែត្រ និងមួយគ្រឿងមានតម្លៃជាង ១២៤លានដុល្លារ។
 

ក្រៅពី Eurofighter Typhoon អង់់គ្លេស ក៏បានទិញយន្តហោះចម្បាំង F-35B Lightning II ពីក្រុមហ៊ុន Lockheed Martin របស់អាម៉េរិក ដើម្បីពង្រឹងដែនអាកាសរបស់ខ្លួន។ កន្លងមក មន្រ្តីការពារជាតិអង់គ្លេស ធ្លាប់បានបញ្ជាក់ថា អង់គ្លេស នឹងបញ្ជាទិញយន្តហោះប្រភេទនេះជាច្រើនគ្រឿង និងអាចមានចំនួនរហូតដល់៦០គ្រឿងឯណោះ ខណៈពេលបច្ចុប្បន្នប្រទេសមហាអំណាចមួយនេះ មានF-35B ចំនួន ២១គ្រឿងរួចហើយ។

 យន្តហោះចម្បាំង F-35B Lightning។  រូបភាព៖ US Marine Corps

ខុសពី F-35A ដែលមានលក្ខណៈជាយន្តហោះចម្បាំងត្រូវការផ្លូវសម្រាប់ហោះវែង និង យន្តហោះចម្បាំងF-35C សម្រាប់បំពាក់លើកងទ័ពជើងទឹកអាម៉េរិកតែមួយគត់ យន្តហោះចម្បាំង F-35B ប្រើផ្លូវសម្រាប់ហោះឡើងគឺមានប្រវែងខ្លីប៉ុណ្ណោះ និងអាចចុះចតឧទ្ធម្ភាគចក្រដែរ។ ក្នុងន័យនេះ F-35B អាចប្រើនៅក្នុងមូលដ្ឋានទ័ព ដែលមានទំហំមធ្យម និងនាវាសម្រាប់ដឹកយន្តហោះបាន។
 

ចំណែកល្បឿន បច្ចេកវិទ្យា និងសមត្ថភាពក្នុងការប្រយុទ្ធ យន្តហោះចម្បាំងមួយនេះ ក៏មិនខុសពី F-35A និង F-35C ដែរ៕