អត្ថន័យនៃការអុជធូបបន់ស្រន់!

ជាតិ

អត្ថន័យនៃការអុជធូបបន់ស្រន់!

09, Oct 2023 , 7:59 am

រូបភាព

ដោយ: ថ្មីៗ

ភ្នំពេញ៖ ប្រជាជនខ្មែរមានទម្លាប់នៃការអុជធូបផ្សេងៗគ្នា ភាគច្រើនគេឃើញមានការអុជធូប១សរសៃ ៣សរសៃ ៥សរសៃ ៧សរសៃ ៩សរសៃ និង១២សរសៃជាដើម។ លោក ញាន ភឿន រដ្ឋលេខាធិការក្រសួងធម្មការ និងសាសនា ពន្យល់ថា នេះគឺជាទម្លាប់របស់បុគ្គលម្នាក់ៗ អាស្រ័យលើការប្រៀបចំនួនសរសៃធូប ទៅនឹងជំនឿណាមួយ ដែលពួកគេយកជាតំណាង។ ទោះជាយ៉ាងណាលោក ញាន ភឿន ថាការអុជធូបនឹងទទួលបានអានិសង្ឃ១០ប្រការ។

លោក ញាន ភឿន រដ្ឋលេខាធិការក្រសួងធម្មការ និងសាសនា ជាទីប្រឹក្សាគណៈកម្មាធិការជាតិ រៀបចំបុណ្យជាតិ-អន្តរជាតិ និងជាសមាជិកគណៈកម្មការស្រាវជ្រាវ វិជ្ជាហោរាសាស្ត្រ និងទំនៀមទម្លាប់ប្រពៃណីខ្មែរ នៃគណៈកម្មាធិការជាតិ រៀបចំបុណ្យជាតិ-អន្តរជាតិ បានបញ្ជាក់ប្រាប់សារព័ត៌មានថ្មីៗថា ចំនួនសរសៃធូប ដែលត្រូវបានអុជផ្សេងៗគ្នានោះ គ្រាន់តែជាទម្លាប់របស់មនុស្សម្នាក់ៗប៉ុណ្ណោះ។

លោក ញាន ភឿន រដ្ឋលេខាធិការក្រសួងធម្មការ និងសាសនា

លោកថា អ្នកខ្លះយកចំនួនសរសៃធូប ដែលពួកគេអុជ ធ្វើជាតំណាងជំនឿអ្វីមួយដែលពួកគេជឿ និងគោរព។ ឧទាហរណ៍ថា អុជធូប៣សរសៃ តំណាងឱ្យរតនៈត្រៃទាំង៣ មានព្រះពុទ្ធ ព្រះធម៌ និងព្រះសង្ឃ។ ខ្លះអុជធូប៥សរសៃ តំណាងឱ្យការគោរព ព្រះពុទ្ធទាំង៥ព្រះអង្គ ដែលបានត្រាស់ដឹងក្នុងភទ្ទកប្បនេះ ឬតំណាងដល់រតនៈត្រៃនិង៣ បូកទាំងគុណមាតាបិតាជាដើម។

ដើម្បីជា្របកាន់តែច្បាស់ សូមអស់លោក លោកស្រី អ្នកនាងកញ្ញា អញ្ជើញស្ដាប់បទសម្ភាសរវាងកញ្ញា ប៉ូ សាគុន ជាមួយលោក ញាន ភឿន រដ្ឋលេខាធិការក្រសួងធម្មការ និងសាសនា ដោយក្ដីសោមនស្ស៖

រដ្ឋលេខាធិការក្រសួងធម្មការ និងសាសនាលោក ញាន ភឿន បញ្ជាក់ថា ចំនួននៃការអុចធូប ដោយគិតជាសរសៃនោះ ពុំបានចែងឬកត់ត្រាតម្រូវក្នុងគម្ពីរព្រះពុទ្ធសាសនាណាមួយឡើយ ដោយនេះអាស្រ័យលើការយកជាតំណាងរបស់បុគ្គលរៀងខ្លួន។ ប៉ុន្តែលោកថា ក្នុងគម្ពីរព្រះត្រៃបីដក មានសរសេរពីអានិសង្ឃនៃការអុជធូប ដែលមានរហូតដល់១០ប្រការ។

អានិសង្ឃនៃការអុជធូប នាំឱ្យមានរាងកាយក្រអូប មានយស មានប្រាជ្ញារហ័ស មានកេរ្ដិ៍ឈ្មោះ មានប្រាជ្ញាមុត មានប្រាជ្ញាដូចផែនដី មានប្រាជ្ញាស្រស់ស្រាយ មានប្រាជ្ញាជ្រៅ មានប្រាជ្ញាទូលាយ និងមានប្រាជ្ញាស្ទុះលឿនទៅ។

បើទោះបីជាការអុជធូប នឹងទទួលបាននូវអានិសង្ឃក៏ពិតមែន ប៉ុន្តែលោក ញាន ភឿន ថាអ្នកអុជធូបទាំងឡាយត្រូវតែមានការប្រុងប្រយ័ត្នខ្ពស់ជានិច្ច រាល់ពេលអុជធូប ដើម្បីកុំឱ្យការកុសល ក្លាយទៅជាក្ដីទុក្ខសោកទៅវិញ។ «សេចក្ដីមិនធ្វេសប្រហែស ជាផ្លូវមិនស្លាប់» ពុទ្ធឱវាទ៕