ភ្នំពេញ៖ គិតត្រឹមរយៈពេល៩ខែ ឆ្នាំ២០២១ កម្ពុជានាំចេញកសិផលកសិកម្មសរុបចំនួន ៥ ៩៣២ ៩២៣,៤៣តោន ទៅកាន់ប្រទេសចំនួន ៦៨។ កសិផលសរុប ដែលកម្ពុជានាំចេញនេះ កើនឡើង ៨៨,៤៨ភាគរយ ពោលគឺកើនឡើង ២ ៧៨៥ ២៣១,៥៧តោន បើប្រៀបធៀបក្នុងរយៈពេលដូចគ្នា ក្នុងឆ្នាំ២០២០។ នេះបើតាមលទ្ធផល ការនាំចេញកសិផលទៅក្រៅប្រទេស របស់អគ្គនាយកដ្ឋានកសិកម្ម ដោយផ្អែកលើប្រព័ន្ធទិន្នន័យគ្រឹះភូតគាមអនាម័យជាតិ។
យោងតាមប្រភពដដែល ក្នុងចំណោមកសិផលសរុបជាង ២,៧លានតោន ការនាំចេញអង្ករទៅក្រៅប្រទេសមានចំនួន ៤១០ ៦៩៨តោន, ស្រូវមានចំនួន ២ ៥២៣ ២៦៣តោន, ចំណិតដំឡូងមីក្រៀមចំនួនជាង ១,៣លានតោន, ដំឡូងមីស្រស់ចំនួនជាង ២,២ម៉ឺនតោន, កាកសំណលដំឡូងមីមានជាង ៦ពាន់តោន។
ដោយឡែកការនាំចេញ គ្រាប់ស្វាយចន្ទីជាង ៨,៩សែនតោន, គ្រាប់ពោតជាង ១,៥សែនតោន, គ្រាប់សណ្ដែកបាយជាង ២,៥ម៉ឺនតោន, គ្រាប់សណ្ដែកសៀងមានជាង ២,៧ម៉ឺនតោន, ផ្លែចេកស្រស់ជាង ៣,៤សែនតោន, ក្រូចថ្លុងជាង ៣,៤ម៉ឺនតោន។
ចំពោះការនាំចេញស្វាយស្រស់មានជាង ១,៧សែនតោន, ដំណាប់ស្វាយជាង ១,៤ម៉ឺនតោន,ទឹកសេរ៉ូស្វាយជាង ៤ពាន់តោន, ដូងប្រេងជាង ៤,៥ម៉ឺនតោន, ម្រេចជាង២,៧ម៉ឺនតោន, ថ្នាំជក់ជាង ២,៥ពាន់តោន, ម្ទេសស្រស់ជាង៨ម៉ឺនតោន, ម្ទេសក្រៀមជាង ១,៧ពាន់តោន, បន្លែចម្រុះជាង ៧៧តោន និងផលិតផលកសិកម្ម៧៤មុខផ្សេងទៀតជាង ១,៥សែនតោន។
ជាមួយគ្នានេះ ការប៉ាន់ប្រមាណតម្លៃ ក្នុងរយៈពេល៩ខែ ឆ្នាំ២០២១ ចំនួនការនាំចេញអង្ករទទួលបាន ៣៤៩ ៩១៤ ៦៩៦ដុល្លារអាមេរិក, ការនាំចេញអង្ករទទួលបាន ៤២៨ ៩៥៤ ៧១០ដុល្លារអាមេរិក និងការនាំចេញកសិផលក្រៅពីស្រូវ និងអង្ករ មានចំនួន ២ ៧១០ ៩០៧ ៥៩៣,០៥ ដុល្លារអាមេរិក។
យ៉ាងណាមិញ ទ្វីបើកសិផលសរុបក្នុងរយៈពេល៩ខែ ក្នុងឆ្នាំ២០២១នេះ មានការកើនឡើងចំនួន ៨៨,៤៨ភាគរយ បើប្រៀបធៀបក្នុងរយៈពេលដូចគ្នា ក្នុងឆ្នាំ២០២០ ប៉ុន្តែការនាំចេញអង្ករមានការថយចុះចំនួន ១៥,៩៧ភាគរយ។ ការណ៍នេះដោយសារ កម្ពុជាជួបបញ្ហាប្រឈមនឹងកង្វះទូរកុងទីន័រផ្ទុកអង្ករ និងតម្លៃដឹកជញ្ជូនខ្ពស់៕