ទំនាក់ទំនងឆ្លងច្រកសមុទ្រតៃវ៉ាន់ ហាក់ឡើងកម្ដៅខ្លាំងចាប់ពីដើមខែតុលាមក ដោយភាគីទាំងពីរឆ្លើយឆ្លងពាក្យសម្ដីគ្នាមិនចេះដាច់។ ខណៈចិននៅតែរក្សាមហិច្ឆតាបង្រួបង្រួមទឹកដីនោះ កោះតៃវ៉ាន់វិញហាក់គ្មានចេតនាដូចគ្នានេះសូម្បីបន្តិច។ អំឡុងពិធីរម្លឹកខួប១១០ នៃបដិវត្តន៍ផ្ដួលរំលំនៅថ្ងៃទី៩ ខែតុលា ប្រធានាធិបតីចិន ស៊ី ជិនភីង បញ្ជាក់ជាថ្មីបំណងបង្រួបបង្រួមទឹកដី តែលោកមិននិយាយដល់ការប្រើកម្លាំងយោធាដូចពេលកន្លងមកឡើយ។

 

 

នៅដែនកោះតៃវ៉ាន់ ក្នុងពិធីរម្លឹកខួបដូចគ្នានេះ មេដឹកនាំតៃវ៉ាន់ Tsai Ing-wen បានប្រើប្រាស់ពិធីនេះដើម្បីផ្ញើសារទៅទីក្រុងប៉េកាំងវិញថា តៃវ៉ាន់នឹងបន្តបង្កើនការការពារជាតិ និងបង្ហាញការតាំងចិត្តរបស់ការពារខ្លួនឯង។ បើតាមលោកស្រី Tsai នឹងមិនមានអ្នកណាអាចបង្ខំតៃវ៉ាន់ឱ្យដើរតាមការកំណត់របស់ចិនបានឡើយ ហើយគេឯងក៏មិនត្រូវមានការស្រមៃថា ប្រជាជនតៃវ៉ាន់ នឹងឱនលំទោនចំពោះមុខការដាក់សម្ពាធឡើយ។

 

«នេះក៏ព្រោះតែផ្លូវដែលចិនបង្ហាញ មិនបានផ្ដល់ជីវិតបែបប្រជាធិបតេយ្យ និងសេរីភាព ឬអធិបតេយ្យសម្រាប់មនុស្ស២៣លាននាក់ឡើយ។» លោកស្រី Tsai លើកឡើងបែបនេះដោយសំដៅសំណើរបស់ទីក្រុងប៉េកាំងដែលចង់អនុវត្តគោលការណ៍ «ប្រទេសមួយ ប្រព័ន្ធពីរ» នៅតៃវ៉ាន់ ដូចនៅហុងកុង និងម៉ាកាវដែរ។ 

 

ក្នុងសុន្ទរកថាដដែល មេដឹកនាំតៃវ៉ាន់ដែលជាមុខសញ្ញារិះគន់របស់ប៉េកាំងចំពោះជំហរផ្ដាច់ខ្លួននោះ ក៏បញ្ជាក់ឡើងវិញការស្នើរបស់ខ្លួនទៅកាន់រដ្ឋាភិបាលចិនឱ្យចូលតុចរចាតាមគោលការណ៍ស្មើភាព។ លោកស្រី ថែមទាំងប្រកាសគាំទ្រការរក្សាស្ថានភាពច្រកសមុទ្របច្ចុប្បន្នទៀតផង។

 

បើទោះជាមានជំហរប្រកាសឯករាជ្យក្ដី លោកស្រី Tsai ត្រូវមើលឃើញថា មិនទាន់ហ៊ានដូច្នោះដែរ។ ចិនចាត់ទុកការប្រកាសឯករាជ្យណាមួយ ជាបន្ទាត់ក្រហម ហើយការឆ្លងបន្ទាត់នេះ ជាការបើកផ្លូវដលការប្រើកម្លាំងយោធាតែម្ដង៕