ជាតិ
អាជ្ញាធរខេត្តកំពត បើកទ្វារទំនប់វារីអគ្គិសនីកំចាយ ដើម្បីរំដោះទឹកជំនន់ រូបភាពពី_ក្រសួង_រ៉ែ និង_ថាមពល
× ភ្នំពេញ៖ ក្រោយភ្លៀងធ្លាក់ជាបន្តបន្ទាប់ ក្រុមបច្ចេកទេសនៃទំនប់វារីអគ្គិសនីកំចាយក្នុងខេត្តកំពត នៅម៉ោង១១៖០០ព្រឹក ថ្ងៃទី១១ ខែតុលានេះ បានបើកបង្ហូរទឹកសន្សឹមៗចេញពីទំនប់វារីអគ្គិសនីកំចាយ ខណៈទឹកកើនឡើងដល់កម្រិតរំដោះត្រូវចេញ។ នេះបើតាមសេចក្តីជូនដំណឹងរបស់គណៈកម្មាធិការគ្រប់គ្រងគ្រោះមហន្ដរាយខេត្ត។
គណៈកម្មាធិការគ្រប់គ្រងគ្រោះមហន្តរាយខេត្តកំពត បានចេញសេចក្តីជូនដំណឹងស្ដីពីការបើកទំនប់វារីអគ្គិសនីកំចាយ ដើម្បីរំដោះទឹកចេញ បន្ទាប់ពីមានភ្លៀងពីរបីថ្ងៃជាប់គ្នា។ បើតាមសេចក្ដីជូនដំណឹងខាងលើ ស្ថានភាពក្នុងអាងស្ដុកទឹកទំនប់វារីអគ្គិសនីកំចាយ មានការកើនឡើង តម្រូវឱ្យក្រុមបច្ចេកទេស បើកទំនប់បង្ហូរទឹកចេញនៅម៉ោង ១១៖០០ព្រឹកនេះ។
គណៈកម្មាធិការគ្រប់គ្រងគ្រោះមហន្ដរាយខេត្តកំពត បានប្រាប់សារព័ត៌មានថ្មីៗ២៥ តាមទូរសព្ទថា៖ «ក្រុមបច្ចេកទេស បានបើកទឹកបង្ហូរសន្សឹមៗសិន ដើម្បីកុំឱ្យជន់ខ្លាំង។ បច្ចុប្បន្ននេះ ទឹកឡើងដល់កម្រិត១៤៨សង់ទីម៉ែត្រ ដែលជាកម្រិតប្រកាសអាសន្ន។ បើមើលតាមធម្មតាមិនទាន់ជន់ខ្លាំងទេ តែត្រូវតែរំដោះចេញខ្លះ ដើម្បីឱ្យទឹកមានកម្រិតស្មើដូចធម្មតា និងជាការជូនដំណឹងដល់ពលរដ្ឋក្នុងតំបន់ រួមជាមួយទេសចរ ដែលទៅកម្សាន្ដនៅតំបន់នោះបានត្រៀមជាមុន»។
ទន្ទឹមនឹងនេះ គណៈកម្មាធិការគ្រប់គ្រងគ្រោះមហន្ដរាយខេត្ត និងរដ្ឋបាលខេត្តកំពត បានអំពាវនាវឱ្យពលរដ្ឋទាំងអស់ប្រុងប្រយ័ត្ន និងរៀបចំការពារខ្លួនជាមុន ដើម្បីបញ្ចៀសនូវគ្រោះថ្នាក់ ដែលអាចកើតឡើងជាយថាហេតុ៕
Tag:
ខេត្តកំពត
វារីអគ្គីសនីកំចាយ
រំដោះទឹក
© រក្សាសិទ្ធិដោយ thmeythmey.com