កងកម្លាំងវរសេនាតូចថ្មើរជើងលេខ៥១៣ និងកម្លាំងចម្រុះក្នុងតំបន់ បានចុះល្បាតតាមបន្ទាត់ព្រំដែននៅឃុំអូរសំព័រ ស្រុកម៉ាឡៃ ហើយក៏ប្រទះឃើញពលករខ្មែរមួយក្រុម បានព្យាយាមឆ្លងដែនទៅប្រទេសថៃទាំងយប់ ដូច្នេះសមត្ថកិច្ចក៏សម្រេចឃាត់ខ្លួនពួកគេតែម្ដង។ 

 

បើតាមការសាកសួរ របស់សមត្ថកិច្ច ពលករទាំងនោះ គឺមានបំណងទៅស្វែងរកការងារនៅប្រទសថៃ។ បន្ទាប់មកពួកគេ ក៏ត្រូវបានសមត្ថកិច្ចជំនាញធ្វើការណែនាំ និងរៀបចំអនុវត្តតាមផ្លូវច្បាប់ ដើម្បីទប់ស្កាត់ការឆ្លងដែនខុសច្បាប់និងការរាលដាលកូវីដ-១៩។ 


             ពលករបម្រុងឆ្លងដែនខុស​ច្បាប់។ (រូបពី RCA)

 

សូមបញ្ជាក់ថា ចាប់តាំងពីមាន​ការរាលដាលកូវីដ-១៩ចូលក្នុងសហគមន៍ រដ្ឋាភិបាលបានចាត់វិធានការទប់ស្កាត់តាមព្រំដែន ដោយពង្រឹងការយាមល្បាតតឹងរឹង ដើម្បីកុំឲ្យមានការឆ្លងដែនខុសច្បាប់ និងរាលដាលឆ្លងកូវីដ-១៩។ 

 

គិតចាប់ពីខែធ្នូឆ្នាំ២០២០ មកដល់ពេលនេះ មានពលរដ្ឋ និងពលករត្រលប់ពីប្រទេសថៃវិញចំនួន ៥ម៉ឺននាក់ ។ ក្នុងនោះអាជ្ញាធរថៃ បានចាប់បញ្ជូនពលរដ្ឋខ្មែរ ឆ្លងដែនខុសច្បាប់មកវិញជាង៦ពាន់នាក់។ នេះបើតាមរបាយការណ៍ដែលសារព័ត៌មានថ្មីៗ ទទួលបានពីលោក កែវ វណ្ណថន អគ្គនាយករង និងជាអ្នកនាំពាក្យនៃអគ្គនាយកដ្ឋានអន្តោប្រវេសន៍៕