សហគមន៍ទួលព័ន្ធតាឡី ព្រួយបារម្ភព្រៃជម្រកសត្វស្លាបកាន់តែរេចរឹល

ជាតិ

សហគមន៍ទួលព័ន្ធតាឡី ព្រួយបារម្ភព្រៃជម្រកសត្វស្លាបកាន់តែរេចរឹល

13, Oct 2021 , 9:59 pm

រូបភាព

ដោយ: ប៉ូ សាគុន

ព្រៃវែង៖ ស្របពេលដែលសត្វស្លាបខ្ទង់រាប់លានក្បាល កាន់តែកើនឡើងជាបន្តបន្ទាប់ពីមួយឆ្នាំទៅមួយឆ្នាំ ព្រៃឈើដែលជាជម្រកសត្វទាំងនោះ ក៏កាន់តែរេចរឹលទៅៗ ព្រោះតែសត្វទាំងនោះកាច់យកទៅធ្វើជាសម្បុក។ ទោះជាយ៉ាងណា សហគមន៍អភិរក្សសត្វស្លាបទួលព័ន្ធតាឡី-បឹងស្នេហ៍ កំពុងតែប្រឹងប្រែងរកដំណោះស្រាយ ជាមួយដៃគូពាន់ព័ន្ធនានា ដើម្បីដាំដើមឈើបន្ថែម។

លោក នួន សារ៉េត អនុប្រធានសហគមន៍អភិរក្សសត្វស្លាបទួលព័ន្ធតាឡី-បឹងស្នេហ៍ បានប្រាប់សារព័ត៌មានថ្មីៗ ខណៈលោកកំពុងឈរនៅលើប៉មមើលសត្វស្លាប ក្នុងតំបន់ទួលព័ន្ធតាឡី-បឹងស្នេហ៍ ថាកន្លងមកសហគមន៍បានដាំដើមឈើប្រមាណជាង២ពាន់ដើមមកហើយ ដើម្បីបន្ថែមលើព្រៃឈើធម្មជាតិដែលមានស្រាប់។ ប៉ុន្តែដើមឈើទាំងនោះ ត្រូវបានរេចរិលទៅវិញ ព្រោះតែសត្វស្លាបកាច់យកទៅធ្វើសម្បុក ដើម្បីពងកូន។

ជាងនោះទៅទៀត ដើមឈើខ្លះត្រូវរេចរឹល ហើយជ្រុះស្លឹកស្ទើរតែអស់ ព្រោះតែសត្វបន្ទោបង់លាមកដាក់។ ជាដំណោះស្រាយ សហគមន៍អភិរក្សសត្វស្លាបទួលព័ន្ធតាឡី-បឹងស្នេហ៍ កំពុងរកមធ្យោបាយយ៉ាងណា ដាំដើមឈើដែលអាចលិចទឹកបាន ទុកជាជម្រកសត្វស្លាបផង នឹងសម្រាប់អភិរក្សពូជត្រីផង។

លោក នួន សារ៉េត បន្ថែមថា លោកពុំអាចរាប់ចំនួនសត្វស្លាបនៅទីនេះបានឡើយ ព្រោះវាមានចំនួនច្រើន រហូតមិនក្រោមរាប់លានក្បាល ម្យ៉ាងសត្វចេះតែកើនឡើងជារៀងរាល់ថ្ងៃ។

«ឆ្នាំ២០២០សត្វកើនឡើងកាន់តែច្រើន។ ពីមុនសត្វមកទីនេះតែ២ទៅ៣ខែ វាក៏ផ្លាស់ទីទៅវិញ ទើបតែចុងឆ្នាំ២០១៩និងដើមឆ្នាំ២០២០ សត្វចាប់ផ្ដើមកើនច្រើន ទាំងការពងកូន និងកាច់សម្បុក។ ខ្ញុំស្មានមិនដល់ថាសត្វកើនឡើងដល់ថ្នាក់នេះ។ ស្របពេលនេះ ព្រៃរបោះក៏រេចរឹលព្រោះសត្វកាច់សម្បុក។ សហគមន៍នឹងប្រឹងប្រែងរកដៃគូ ដាំដើមឈើលិចទឹកបន្ថែម។ សត្វនៅទីនេះមាន៥៣ប្រភេទ ដូចជាននៀលពណ៌ ក្អែកទឹក កុក ត្រយងខ្លួនស ត្រយងខ្លួនរលោង ខ្វែក តាដក់ និងចង្កៀលខ្យងជាដើម»។ នេះជាការបញ្ជាក់របស់លោក នួន សារ៉េត។

បន្ថែមពីនោះ លោក អនុប្រធានសហគមន៍ បញ្ជាក់ទៀតថា ក្រសួងបរិស្ថានមានគម្រោងជីកបៀ ដោយទប់ជាទំនប់ ដើម្បីឱ្យត្រីរស់នៅក្នុងនោះ ព្រមទាំងអាចចិញ្ចឹមខ្យង ទុកជាចំណីសម្រាប់សត្វស្លាបណា ដែលនៅតូចៗ ឬសត្វចាស់ៗខ្លាំង ហើរទៅរកចំនីឆ្ងាយមិនបាន។

សូមបញ្ជាក់ថា កាលពីឆ្នាំ១៩៩០-១៩៩៧ តំបន់ទួលព័ន្ធតាឡី-បឹងស្នេហ៍ ត្រូវបានអភិរក្សដើម្បីជាកន្លែងត្រីពង ជាកន្លែងជម្រកចិញ្ចឹមសត្វ រួមទាំងទប់ស្កាត់ការរុករានព្រៃឈើផងដែរ។ រហូតមកដល់ឆ្នាំ២០១៩ -២០២០ សហគមន៍នេះ ត្រូវបានរៀបចំឱ្យក្លាយជាតំបន់ទេសចរណ៍ សម្រាប់ទទួលប្រជាពលរដ្ឋទៅទស្សនាសត្វស្លាប៕