ជាតិ
សេដ្ឋកិច្ច
សម្តេច ហ៊ុន សែន៖ វិស័យឯកជនមានតួនាទីសំខាន់ ៣ ក្នុងការស្តារសេដ្ឋកិច្ចក្នុងតំបន់នៅឆ្នាំ២០២២
×![]()
ភ្នំពេញ៖ វិស័យឯកជន ត្រូវមានតួនាទីសំខាន់ចំនួន៣ ក្នុងការរួមចំណែកសម្រេចឱ្យបាននូវទិសដៅការងារ និងផែនការការងារអាស៊ានក្នុងឆ្នាំ ២០២២ ដើម្បីជំរុញការស្តារ និងអភិវឌ្ឍសង្គម-សេដ្ឋកិច្ច ប្រកបដោយចីរភាព។ នេះជាការលើកឡើងរបស់ សម្តេច ហ៊ុន សែន។
សម្តេច ហ៊ុន សែន បានអះអាងថា វិស័យឯកជនត្រូវមានតួនាទីសំខាន់ៗ៣ ក្នុងការរួមចំណែកសម្រេចឱ្យបាននូវការងារអាទិភាព និងផែនការការងារអាស៊ានក្នុងឆ្នាំ ២០២២ ដើម្បីជំរុញការស្តារ និងអភិវឌ្ឍសង្គម-សេដ្ឋកិច្ច ប្រកបដោយចីរភាព។ ជាពិសេស ជំរុញដល់ការងើបឡើងវិញនៃសង្គម-សេដ្ឋកិច្ច ប្រកបដោយសមធម៌ និងបរិយាប័ន្ន។ សម្តេចលើកឡើងដូច្នេះ នៅក្នុងពិធីបិទកិច្ចប្រជុំកំពូលធុរកិច្ច និងវិនិយោគអាស៊ានក្រោមប្រធានបទ៖ «កសាងអនាគតឌីជីថលប្រកបដោយចីរភាពរបស់យើង» នៅថ្ងៃទី ២៥តុលា ឆ្នាំ២០២១។
បើតាមសម្តេច ហ៊ុន សែន តួនាទីសំខាន់ទាំង៣របស់វិស័យឯកដែលត្រូវចូលរួមជាមួយរដ្ឋាភិបាល ក្នុងការស្តារឡើងវិញសេដ្ឋកិច្ចជាតិ និងតំបន់អាស៊ាននោះ មាន៖ ទីមួយ. វិស័យឯកត្រូវទាញយកប្រយោជន៍ឱ្យបានជាអតិបរមា ពីកិច្ចព្រមព្រៀងពាណិជ្ជកម្មសេរីតំបន់អាស៊ាន ដែលមានស្រាប់។ ជាពិសេសគឺទាញប្រយោជន៍ពីកិច្ចព្រមព្រៀង អាសិប (RCEP) ដែលគ្រោងនឹងចូលជាធរមាននៅដើមឆ្នាំ២០២២ ដើម្បីជំរុញសកម្មភាពពាណិជ្ជកម្មនិងវិនិយោគ ជាពិសេសជំរុញវិនិយោគផ្ទាល់ពីបរទេស ដើម្បីបង្កើតការងារ, បង្កើនប្រាក់ចំណូលជូនប្រជាពលរដ្ឋ និងជំរុញកំណើនសេដ្ឋកិច្ច។
ទីពីរ. វិស័យឯកជន ត្រូវចូលរួមចំណែកអភិវឌ្ឍធនធានមនុស្ស តាមរយៈការផ្ទេរបច្ចេកវិទ្យា ចំណេះដឹង និងចំណេះធ្វើ ជាពិសេសការអភិវឌ្ឍជំនាញឌីជីថល, ព្រមទាំងការលើកកម្ពស់វិទ្យាសាស្ត្រ បច្ចេកវិទ្យា និង នវានុវត្តន៍ តាមរយៈការចូលរួមសហការជាមួយធុរកិច្ច និងវិនិយោគផ្ទាល់ពីបរទេស ដែលជួយកាត់បន្ថយគម្លាតឌីជីថល និងការអភិវឌ្ឍសេដ្ឋកិច្ចឌីជីថលក្នុងតំបន់។
ទី៣. វិស័យឯកជនត្រូវលើកកម្ពស់កិច្ចសហការរវាងវិស័យសាធារណៈ និងវិស័យឯកជន ជាពិសេសតាមរយៈ យន្តការភាពជាដៃគូរវាងរដ្ឋ និងឯកជន ក្នុងគោលបំណងកៀរគរធនធានហិរញ្ញវត្ថុមកប្រើប្រាស់ក្នុងការអភិវឌ្ឍ និងការអនុវត្តគំនិតផ្តួចផ្តើមនានា ដើម្បីជួយបំពេញតម្រូវការផ្នែកហិរញ្ញវត្ថុសម្រាប់ការស្ដារ ឡើងវិញនូវកិច្ចអភិវឌ្ឍន៍សង្គម-សេដ្ឋកិច្ច។
ដើម្បីលើកកម្ពស់ដល់ការចូលរួមរបស់វិស័យឯកជន ក្នុងការស្តារ និងជំរុញកំណើនសេដ្ឋកិច្ចជាតិ រដ្ឋាភិបាលបានប្រកាន់ភ្ជាប់នូវអភិក្រមនៃការប្រែក្លាយវិបត្តិឱ្យទៅជាកាលនុវត្តភាព តាម រយៈការដាក់ចេញនិងជំរុញការអនុវត្តនូវគោលនយោបាយ និងវិធានការសំខាន់ៗ។ រួមមាន៖ ក្របខ័ណ្ឌគោលនយោបាយសេដ្ឋកិច្ច និងសង្គម ឌីជីថលកម្ពុជា ២០២១-២០៣៥ និង ច្បាប់ស្តីពីវិនិយោគថ្មីៗ ព្រមជាមួយនឹងការបញ្ចប់នូវ ច្បាប់ស្តីពី sភាពជាដៃគូរវាងរដ្ឋ និងឯកជន, កិច្ចព្រមព្រៀងពាណិជ្ជកម្មសេរីកម្ពុជា-ចិន(CCFTA) និង កិច្ចព្រមព្រៀង ពាណិជ្ជកម្មសេរីកម្ពុជា-កូរ៉េ (CKFTA)ដែលនឹងចូលជាធរមាន ក្នុងពេលឆាប់ៗខាងមុខ ៕
Tag:
ពាណិជ្ជកម្ម
RCEP
សម្តេច ហ៊ុន សែន
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 ថ្ងៃ
