ជាតិ
លោក វ៉ាត់ ចំរើន លើកទឹកចិត្តអ្នកកាសែតកីឡាផ្សព្វផ្សាយភាពវិជ្ជមាននៃកីឡាឲ្យបានច្រើន
× នាពិធីបើកវគ្គសិក្សាជំរុញការផ្សព្វផ្សាយស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ នៅព្រឹកថ្ងៃទី០១ ខែវិច្ឆិកានេះ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជាអគ្គលេខាធិការគណៈកម្មការរៀបចំកីឡាអាស៊ីអាគ្នេយ៍ លើកទី៣២ (CAMSOC) បានជំរុញឱ្យមានការផ្សព្វផ្សាយពីភាពវិជ្ជមានកីឡា ឱ្យបានច្រើនជាងអវិជ្ជមាន ដើម្បីកុំឱ្យប៉ះពាល់ដល់ចលនាកីឡាជាតិ។
លោក វ៉ាត់ ចំរើន បាននិយាយថា ការផ្សព្វផ្សាយបែបអវិជ្ជមាន តាមរយៈព័ត៌មានកីឡានៅតែមានច្រើនខណៈភាពវិជ្ជមានតិចតួចនៅឡើយ។ អគ្គលេខាធិការគណៈកម្មាធិការជាតិរៀបចំការប្រកួតស៊ីហ្គេម CAMSOC បានថ្លែងក្នុងពិធីបើកវគ្គសិក្សាជំរុញការផ្សព្វផ្សាយស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ថា៖«ការផ្សព្វផ្សាយព័ត៌មានកីឡាក្នុងប្រទេសកម្ពុជារបស់យើង គឺមានមុខពីរដូចគ្នា គឺទាំងភាពអវិជ្ជមាននិងភាពវិជ្ជមាន ប៉ុន្តែផលវិជ្ជមាននូវមានតិចនៅឡើយ ដោយសារការយល់ដឹងរបស់អ្នកសារព័ត៌មានកីឡាខ្លៈ មិនមានវិជ្ជាជីវៈកីឡានៅឡើយ ក្នុងការបំផុសបំផុលចលនាកីឡាទៅក្នុងសង្គមពេលបច្ចុប្បន្ន»។
សម្រាប់លោក វ៉ាត់ ចំរើន អ្នកកាសែតត្រូវស្រឡាញ់ និងចូលចិត្តកីឡា ជាពិសេសត្រូវតាំងខ្លួន ដូចជាអាជ្ញាកណ្ដាលក្នុងការផ្សព្វផ្សាយព័ត៌មាន តាមបែប Fair Play នៃកីឡា។
លើសពីនេះទៀត លោក វ៉ាត់ ចំរើន ក៏ស្នើឲ្យអ្នកសារព័ត៌មានកីឡាទាំងអស់ ស្វែងយល់អំពីតួនាទី និងភារកិច្ចឲ្យបានត្រឹមត្រូវ តាមបែបជំនាញកីឡា ដើម្បីជាកម្លាំងជំរុញព័ត៌មានពិតៗពីវិស័យកីឡាដល់ប្រជាពលរដ្ឋ និងប្រទេសជាតិ ជាពិសេសការផ្សព្វផ្សាយពីការធ្វើជាម្ចាស់ផ្ទះស៊ីហ្គេម និងអាស៊ានប៉ារ៉ាហ្គេម ២០២៣ ខាងមុខ។
វគ្គសិក្សាស្តីពី «តួនាទីអ្នកសារព័ត៌មានកីឡាតាមរយៈបទពិសោធជនជាតិជប៉ុន» នេះ មានសិក្ខាកាមចូលរួមជិត១០០នាក់ ទាំងអ្នកដែលរៀនតាមប្រព័ន្ធ Zoom និងអ្នកដែលរៀនផ្ទាល់នៅទីស្នាក់ការ NOCC។ សហការរៀបចំឡើងដោយមូលនិធិជប៉ុន និងក្លិបអ្នកកាសែតកម្ពុជា និងគាំទ្រដោយ CAMSOC និង NOCC វគ្គសិក្សានេះ ចែកចេញទី២វគ្គ ដោយវគ្គទី១ សិក្សារយៈពេល៤ថ្ងៃ ចាប់ពីថ្ងៃទី១-៤ វិច្ឆិកា ២០២១ ចំណែកវគ្គទី២ ចាប់ពីថ្ងៃទី៦-៩ ខែធ្នូ ២០២១។
នៅថ្ងៃដំបូង សិក្ខាកាមបានសិក្សារៀនសូត្រពីបទពិសោធន៍ការងាររបស់ លោក យ៉ុស៊ិដា សេអ៊ិឈិ អតីតអ្នកសារព័ត៌មានកីឡានៅសារព័ត៌មាន Nikkei Inc ហើយបច្ចុប្បន្នជាមន្ត្រីបម្រើការនៅក្លិបបាល់ទាត់អាជីព Kashima Antlers FC នៃក្របខណ្ឌ J League។ លោកបានធ្វើបទបង្ហាញស្តីពីទ្រឹស្តីទូទៅនៃសារព័ត៌មានកីឡា៕
© រក្សាសិទ្ធិដោយ thmeythmey.com