Jepchirchir គឺជាកីឡាការិនីកេនយ៉ាដំបូង ដែលបានឈ្នះមេដាយមាសអូឡាំពិក និងឈ្នះការរត់ប្រណាំងម៉ារ៉ាតុន ក្នុងឆ្នាំតែមួយ។ កីឡាការិនីរូបនេះ បានរត់មកដល់ទីមុនកីឡាការិនីដទៃទៀត ក្នុងថេរវេលា ២ម៉ោង ២២នាទីនិង៣៩វិនាទី ចំណែកកីឡាការិនី Viola Cheptoo និងកីឡាការិនីអេត្យូពី Ababel Yeshaneh មកដល់ទីក្នុងចំណាត់ថ្នាក់លេខ២ និងលេខ៣ ជាបន្តបន្ទាប់។
 

ជាមួយនឹងជ័យជម្នះដ៏គួរឲ្យភ្ញាក់ផ្អើល Jepchirchir បាននិយាយថា« បន្ទាប់ពីខ្ញុំឈ្នះមេដាយមាសអូឡាំពិកសម្រាប់ការរត់ប្រណាំងនេះ ខ្ញុំមិនគិតថាខ្ញុំនឹងឈ្នះម្តងទៀតនោះទេ។ខ្ញុំបានបញ្ចប់ការហ្វឹកហាត់យ៉ាងជោគជ័យ ខ្ញុំបានព្យាយាមធ្វើវាដោយហ្មតចត់ ខ្ញុំបានត្រៀមរួចរាល់មុនការប្រកួត ខ្ញុំពិតជាសប្បាយចិត្តសម្រាប់ជ័យជម្នះនេះ»។
 

ចំណែកកីឡាករ Albert Korir ដែលជាកីឡាករឈ្នះការប្រកួតរត់ផ្នែកបុរស បានរត់ដល់ទីព្រ័ត្រ ដោយប្រើរយៈពេល ២ម៉ោង ៨នាទីនិង២២វិនាទី ខណៈដែលកីឡាករសញ្ជាតិម៉ារ៉ុក Mohamed El Aaraby បានបញ្ចប់ចំណាត់លេខ ២ ដោយមកដល់ទីក្រោយរយៈពេល ៤៤វិនាទី។ ចំណែក កីឡាករអ៊ីតាលី Eyob Faniel មកដល់ទីលេខ៣៕