កម្ពុជា សុំអូស្ត្រាលីឱ្យជួយរៀបចំផែនការមេគ្រប់គ្រងទឹកកខ្វក់ទូទាំងប្រទេស

ជាតិ

សេដ្ឋកិច្ច

កម្ពុជា សុំអូស្ត្រាលីឱ្យជួយរៀបចំផែនការមេគ្រប់គ្រងទឹកកខ្វក់ទូទាំងប្រទេស

18, Nov 2021 , 9:59 pm

រូបភាព

រូបថត៖ក្រសួងសាធារណការ និងដឹកជញ្ជូន

ដោយ: ខន ចំប៉ា

កម្ពុជា បានស្នើសុំឱ្យអូស្ត្រាលី ជួយរៀបចំផែនការសម្រាប់ការគ្រប់គ្រងទឹកកខ្វក់នៅក្នុងខេត្ត ព្រះសីហនុ ក៏ដូចជាផែនការសម្រាប់ការគ្រប់គ្រងទឹកកខ្វក់នៅទូទាំងប្រទេសតែម្តង។ សំណើនេះ ធ្វើឡើងក្នុងជំនួបទ្វេភាគីរវាង លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងលោក Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា កាលពីថ្ងៃទី១៧ ខែវិច្ឆិកា។

លោក ស៊ុន ចាន់ថុល បានពន្យល់បន្ថែមជុំវិញសំណើនេះថា កំណើនប្រជាជន និងការអភិវឌ្ឍសេដ្ឋកិច្ចកាន់តែខ្លាំងរបស់កម្ពុជា បានធ្វើឱ្យទឹកកខ្វក់ត្រូវបានបង្ហូរចេញទៅសមុទ្រដោយផ្ទាល់ គ្មានការចម្រោះជាមុននោះទេ។

បន្ថែមពីលើនេះ រដ្ឋមន្ត្រីក្រសួងសាធារណការ បានស្នើអូស្ត្រាលី ឱ្យពិនិត្យលទ្ធភាពគាំទ្រការបណ្តុះបណ្តាលនៅវិទ្យាស្ថានតេជោ សែន សាធារណការ និងដឹកជញ្ជូនផងដែរ ដែលវិទ្យាស្ថាននេះ ជាថ្នាលពង្រឹងសមត្ថភាពវិស្វករកម្ពុជា ឱ្យអាចសាងសង់ហេដ្ឋារចនាសម្ព័ន្ធប្រកបដោយគុណភាព និងការរៀបចំគោលនយោបាយ សម្រាប់ការដឹកជញ្ជូនបៃតង។ ក្រសួង នឹងខិតខំពន្លឿននិងលើកទឹកចិត្ត ឱ្យមានការប្រើប្រាស់យានយន្តដើរដោយថាមពលអគ្គិសនី កាន់តែទូលំទូលាយនៅក្នុងប្រទេស។ នេះជាអះអាងរបស់លោក ស៊ុន ចាន់ថុល។

បើតាមលោក ស៊ុន ចាន់ថុល កម្ពុជាត្រូវការថវិកាប្រមាណ៤៨ពាន់លានដុល្លារអាម៉េរិក ដើម្បីអនុវត្តគម្រោងចំនួន៣៣០ ដែលត្រូវបានកំណត់នៅក្នុងផែនការមេ ប្រព័ន្ធដឹកជញ្ជូនពហុមធ្យោបាយ និងការតភ្ជាប់ ក្នុងរយៈពេល១០ឆ្នាំខាងមុខ។

ជាការឆ្លើយតប លោក Pablo Kang ឯកអគ្គរដ្ឋទូតអូស្ត្រាលី បានសន្យាឆ្លើយតបសំណើទាំងនេះដោយវិជ្ជមាន។ ឯកអគ្គរដ្ឋទូតអូស្ត្រាលី ក៏បានចាប់អារម្មណ៍លើការអភិវឌ្ឍវិស័យដឹកជញ្ជូនបៃតង ដើម្បីកាត់បន្ថយបម្រែបម្រួលអាកាសធាតុ និងការអភិវឌ្ឍហេដ្ឋារចនាសម្ព័ន្ធផ្លូវថ្នល់នៅកម្ពុជាផងដែរ៕