នាថ្ងៃទី១៧វិឆ្ឆិកា​ លោក សុខ ទូច ប្រធានរាជបណ្ឌិត្យសភាកម្ពុជា​ បានផ្សព្វផ្សាយពីវគ្គបណ្ដុះបណ្ដាលជំនាញ ម្ហូបអាហារ និងក្រឡុកស្រា ដោយផ្ដោតលើទស្សនវិជ្ជា៤។ ទស្សនទស្សនវិជ្ជាទាំងនោះមាន តម្លៃទាប គឹត្រូវដាំដំណាំ និង ចិញ្ចឹមសត្វក្នុងស្រុក។ ចំណែក ឆ្ងាញ់ មានន័យថាចុងភៅត្រូវមានវិជ្ជាជីវៈ និងជំនាញ ។ គុណភាព គឺសម្ដៅលើ គុណភាពមនុស្ស គុណភាពផលិតផល និង គុណភាពបរិស្ថាន​។ ចំណែក ស្នាមញញឹម គឺមិនមែនតែ ញញឹមលើប្រាសាទបាយ័នប៉ុណ្ណោះ តែស្នាមញញឹមលើម្ហូបអាហារ​។
 

បើតាម លោក សុខ ទូច វគ្គបណ្ដុះបណ្ដាលនេះ គឺដើម្បីកសាងជំនាញដល់ប្រជាជនខ្មែរ ដើម្បីរកចំណូលពីភ្ញៀវបរទេស ព្រមទាំងផ្ដល់ជំនាញដល់អ្នកទៅធ្វើការក្រៅប្រទេស ផងដែរ។ លោកសង្កត់ធ្ងន់ថា បើសិនប្រជាពលរដ្ឋខ្មែរ ដែលទៅធ្វើក្រៅប្រទេស ហើយគ្មានជំនាញ ពួកគេមិនអាចធ្វើអ្វីបានក្រៅតែពីប្រើកម្លាំង និងទទួលបានប្រាក់ខែទាបថែមទៀត។
 

ប្រធានរាជបណ្ឌិត្យសភារូបនេះអះអាង ថាការបង្កើតវគ្គបណ្ដុះបណ្ដាលនេះ នឹងជួយកាត់បន្ថយភាពក្រីក្រក្នុងប្រទេសកម្ពុជា។ « អ្នកជំនាញ ត្រូវមានចំណេះរកចំណូល សម្រាប់ចំណាយក្នុងជីវិតគ្រួសារមានភាពរុងរឿង។ ដើម្បីកាត់បន្ថយភាពក្រីក្របានត្រូវមានវិជ្ជាជីវៈ បើគ្មានវិជ្ជាជីវៈគឺយើងមិនអាចឆ្លើយតបនឹងការកាត់បន្ថយភាពក្រីក្រនៅឆ្នាំ២០២៣០បានទេ»។ នេះជាការបញ្ជាក់បន្ថែមរបស់លោក សុខ ទូច​។
 

សូមជម្រាបដែរថា វគ្គបណ្ដុះបណ្ដាលនេះចែកចេញជា៣ផ្នែក សម្រាប់មេផ្ទះ អាចជ្រើសរើសរៀនម្ហូប២-៣មុខតាមអ្វីដែលខ្លួនចង់ចេះ។ វគ្គ​មធ្យម​ មាន​រយៈ​ពេល​៦​ខែ និង​វគ្គមធ្យម​ឯកទេស​ គឺ​ថ្នាក់​​បរិញ្ញាបត្រ​រង​ មាន​រយៈ​ពេល​២​ឆ្នាំ។ វគ្គបណ្ដុះបណ្ដាលនេះគឺតម្រូវឱ្យសិស្សបង់ថ្លៃសិក្សាដោយខ្លួនឯង។ លោក សុច ទូច ប្រាប់សារព័ត៌មាន ThmeyThmey កន្លងមកថា​ ការរៀនមិនបង់ថ្លៃធ្វើឱ្យសិស្សមិនខំរៀន ម្យ៉ាងការបើកវគ្គបណ្ដុះបណ្ដាលក៏ត្រូវចំណាយប្រាក់ដែរ៕