ជាតិ
សេដ្ឋកិច្ច
ADB ផ្ដល់កម្ចី១៨០លានដុល្លារសម្រាប់កែលម្អសេវាកម្មទីក្រុង កំពត បាវិត និងប៉ោយប៉ែត
× ភ្នំពេញ៖ ធានាគារអភិវឌ្ឍន៍អាស៊ី (ADB) បានផ្ដល់ប្រាក់កម្ចី ១៨០ លានដុល្លារ ដល់រដ្ឋាភិបាលកម្ពុជា លើការកែលម្អសេវាកម្មទីក្រុង ដើម្បីជួយដល់ក្រុងចំនួន ៣ នៅកម្ពុជា ធ្វើឱ្យប្រសើរនូវហេដ្ឋ រចនាសម្ព័ន្ធទីក្រុង និង បង្កើនលទ្ធភាពប្រកួតប្រជែងផ្នែកសេដ្ឋកិច្ច។
ធានាគារអាស៊ី បានលើកឡើងថា គម្រោងនេះ នឹងជួយប្រជាពលរដ្ឋជាង ១៤ ម៉ឺននាក់នៅក្រុងបាវិត កំពត និង ប៉ោយប៉ែត ឱ្យទទួលបានសេវាគ្រប់គ្រង ទឹកលូ និង សំណល់រឹងបានល្អប្រសើរ។ ជាពិសេស នឹងជួយកាត់បន្ថយទឹកជំនន់ តាមរយៈការស្ដារនូវប្រព័ន្ធបង្ហូរទឹកភ្លៀង និងប្រព័ន្ធលូបង្ហូរទឹកក្នុងទីក្រុង។ គម្រោងនេះក៏មានគោលបំណង ពង្រឹងសមត្ថភាពរដ្ឋបាល ក្រុងក្នុងការផ្តល់សេវាទីក្រុងផងដែរ។
លោកស្រី Wei Kim Swain អ្នកឯកទេសអភិវឌ្ឍន៍ទីក្រុងរបស់ ADB បានលើកឡើងថា ពលរដ្ឋកម្ពុជាកាន់តែច្រើន បានផ្លាស់លំនៅឋានមកកាន់ទីក្រុង តែលទ្ធភាពទទួលបានហេដ្ឋារចនាសម្ព័ន្ធនិងសេវាកម្មទីក្រុង រួមទាំងបរិស្ថានមិនសូវល្អ ដែលធ្វើឱ្យជីវភាពរស់នៅកាន់តែពិបាក និង ប៉ះពាល់ដល់កំណើនសេដ្ឋកិច្ចទីក្រុង។
អ្នកឯកទេសអភិវឌ្ឍន៍ទីក្រុងរបស់ ADB រូបនេះ បានអះអាងដូច្នេះ៖ «គម្រោងនេះនឹងជួយរាជរដ្ឋាភិបាល ធ្វើឱ្យប្រសើរឡើងនូវការគ្រប់គ្រងទឹកស្អាត អនាម័យ កាកសំណល់ និង លើកកម្ពស់កម្រិតជីវភាពជាពិសេស ក្នុងចំណោមគ្រួសារដែលមានប្រាក់ចំណូលទាប ដែលងាយរងគ្រោះផ្នែកសុខភាព សេដ្ឋកិច្ច និង ផលប៉ះពាល់បរិស្ថានដោយសារអនាម័យមិនល្អ។ វាក៏នឹងជួយអាជ្ញាធរក្រុងទាក់ទាញការវិនិយោគវិស័យឯកជន និងបង្កើតការងារផងដែរ»។
គម្រោងនេះ នឹងគាំទ្រនៅក្រុងបាវិត និងប៉ោយប៉ែត ដល់ការស្តារប្រឡាយដែលមានស្រាប់ និង សាងសង់រោងចក្រប្រព្រឹត្តកម្មទឹកសំណល់ បណ្តាញលូបង្ហូរទឹកភ្លៀង និង កន្លែងចាក់សំរាម។ រីឯនៅក្រុងកំពត នឹងពង្រីកបណ្តាញលូទឹកស្អុយ និងគាំទ្រផែនការសម្រាប់រដ្ឋបាលខេត្ត ដើម្បីពង្រឹងការផ្តល់សេវាកម្មគ្រប់គ្រាន់។
គម្រោងនេះ ក៏នឹងបង្កើតផែនទីបង្ហាញផ្លូវ ដើម្បីបង្កើនការប្រមូលចំណូលដោយរដ្ឋបាលក្រុង ។ ផែនទីបង្ហាញផ្លូវនេះ នឹងរួមបញ្ចូលកំណែទម្រង់ពន្ធគយដើម្បីចំណាយលើប្រតិបត្តិការ និង ការថែទាំទីក្រុង និង ផែនការ រួមទាំងការវាយតម្លៃពីការចូលរូមពីវិស័យឯកជន៕
© រក្សាសិទ្ធិដោយ thmeythmey.com