ការប្រកួត play-off អន្តរទ្វីប មានការចូលរួមពីក្រុមជម្រើសជាតិចំនួន៤ ដែលទទួលបានកន្លះកៅអីពី៤ទ្វីបផ្សេងគ្នា រួមមានទ្វីបអូសេអានី អាស៊ី អាមេរិកខាងត្បូង និងតំបន់ CONCACAF (អាម៉េរិកខាងជើង អាម៉េរិកកណ្តាល និងតំបន់ការ៉ាអ៊ីប)។
 

ក្រុមប្រទេសទាំង៤ នឹងត្រូវប្រជែងគ្នាដណ្តើមយកពីរកៅអីឡើងទៅកាន់វគ្គផ្តាច់ព្រ័ត្រពានរង្វាន់ពិភពលោកឆ្នាំ២០២២នៅប្រទេសកាតា ជាមួយ៣០ប្រទេសផ្សេងទៀតដែលបានកៅអីស្វ័យប្រវត្តិ។
 

ការប្រកួតវគ្គ Play-off ដើមឡើយគ្រោងនឹងធ្វើឡើងចំនួនពីរជើងក្នុងខែមីនា ឆ្នាំ២០២២ ប៉ុន្តែត្រូវបានផ្លាស់ប្តូរទៅធ្វើនៅខែមិថុនា ឆ្នាំ២០២២វិញ ដោយសារការរំខានពីជំងឺកូវីដ-១៩។

មិនត្រឹមតែប្តូរពេលវេលាប្រកួតឡើង FIFA គ្រោងនឹងប្តូររបៀបប្រកួតពីការលេងប្តូរទឹកដីគ្នា ទៅជាលេងមួយប្រកួតនៅទឹកដីកណ្តាលដើម្បីដឹងឈ្នះចាញ់តែម្តង។ ស្ថាប័នគ្រប់គ្រងកីឡាបាល់ទាត់ពិភពលោក អះអាងថាការផ្លាស់ប្តូរនេះ ដើម្បីធានាសុវត្តិភាពកីឡាករ និងមន្ត្រី ឱ្យគេចផុតពីការឆ្លងកូវីដ-១៩។
 

គិតត្រឹមពេលនេះ World Cup 2022 រកឃើញ១៣ក្រុមហើយក្នុងចំណោម៣២ក្រុម រួមទាំងម្ចាស់ផ្ទះកាតា។ ១០ក្រុមពីអឺរ៉ុបដែលទទួលបានកៅអីស្វ័យប្រវត្តិ រួមមាន ម្ចាស់ការពារជើងឯកបារាំង ក្រូអាស៊ី បែលហ្ស៊ិក អាល្លឺម៉ង់ ដាណឺម៉ាក អេស្ប៉ាញ ស៊ែប៊ី អង់គ្លេស ស្វីស និងហូឡង់។ ប្រេស៊ីល និងអាហ្សង់ទីន បានកៅអីមុនគេប្រចាំតំបន់អាម៉េរិកខាងត្បូង ខណៈតំបន់ផ្សេងទៀតមិនទាន់រកឃើញក្រុមផ្លូវការនៅឡើយ៕