កីឡាអន្តរជាតិ
អន្តរជាតិ
Aguero បង្ខំចិត្តបញ្ចប់អាជីពកីឡាករបាល់ទាត់ ព្រោះបញ្ហាបេះដូង
× Sergio Aguero នឹងត្រូវបញ្ចប់អាជីពជាកីឡាករបាល់ទាត់ ដោយសារបញ្ហាបេះដូង។ អតីតខ្សែប្រយុទ្ធ Manchester City រូបនេះ មានបញ្ហាបេះដូងអំឡុងការប្រកួតលីគអេស្ប៉ាញនៅពេល Barcelona ស្មើ ១-១ ជាមួយ Alaves កាលពីថ្ងៃទី៣០ ខែតុលា។
ខ្សែប្រយុទ្ធសញ្ជាតិអាហ្សង់ទីនរូបនេះបានចូលរួមជាមួយ Barcelona ដោយគ្មានតម្លៃផ្ទេរ បន្ទាប់ពីចែកផ្លូវជាមួយ Manchester City នៅដើមរដូវកាល២០២១-២២នេះ។ Aguero អវត្តមានប៉ុន្មានប្រកួតដំបូងដោយសារបួស មុនបង្ហាញខ្លួនជាលើកដំបូងពេល Barca ជួប Valencia នៅថ្ងៃទី១៧ ខែតុលា។
យ៉ាងណាក៏ដោយ នៅពេលជំនួបរវៀងក្រុមរហស្សនាមអ្នកមានបុណ្យទល់នឹង Alaves នៅពីរសប្តាហ៍បន្ទាប់ Aguero ស្រាប់តែមានបញ្ហាឈឺទ្រូងហើយត្រូវប្តូរចេញភ្លាមៗ។ ក្រុមគ្រូពេទ្យប្រចាំនៅ Camp Nou បញ្ចាក់ថា កីឡាករវ័យ៣៣ឆ្នាំរូបនេះ មានបញ្ហាបេះដូង។
លោក Gerard Romero អ្នកយកព័ត៌មានល្បីឈ្មោះមួយរូបរបស់កាសែត MARCA អះអាងថា Aguero នឹងប្រកាសពីការចូលនិវត្តន៍របស់គេនៅក្នុងសន្និសីទសារព័ត៌មានដែលគ្រោងធ្វើនៅសប្តាហ៍ក្រោយនេះហើយ។
ក្រោយការពិនិត្យសុខភាពជាបន្តបន្ទាប់បង្ហាញថា Aguero មានជំងឺបេះដូងមិនប្រក្រតី ដែលត្រូវបង្ខំឱ្យរូបគេចូលនិវត្តន៍ពីអាជីពបាល់ទាត់នៅពេលនេះតែម្តង។ Aguero ដែលជោគជ័យខ្លាំងជាមួយក្លិបអង់គ្លេស Man City លេងបានតែ៥ប្រកួតប៉ុណ្ណោះឱ្យ Barca ទាំងនៅ La Liga និង Champions League និងស៊ុតបញ្ចូលទីបាន១គ្រាប់៕ © រក្សាសិទ្ធិដោយ thmeythmey.com