អន្តរជាតិ
ការរលាយទឹកកកយ៉ាងរហ័សនៅហ្រ្គោអង់ឡង់ បង្កើនហានិភ័យទឹកជំនន់ទូទាំងពិភពលោក
× ការឡើងកម្តៅផែនដីបានធ្វើឱ្យផ្ទាំងទឹកកកនៅកោះហ្រ្គោអង់ឡង់ (Greenland) រលាយកាន់តែច្រើនឡើងៗជាលំដាប់ក្នុងរយៈពេល ៤០ឆ្នាំចុងក្រោយនេះ។ យោងតាមការស្រាវជ្រាវថ្មី ព្រឹត្តិការណ៍រលាយទឹកកកនៅកោះដែលមានទំហំធំជាងគេក្នុងពិភពលោកនេះ បានបង្កើនកម្ពស់ទឹកសមុទ្រយ៉ាងខ្លាំង ហើយវាកំពុងបង្កើនហានិភ័យទឹកជំនន់នៅទូទាំងពិភពលោក។
ការស្រាវជ្រាវមួយចុះផ្សាយលើទិនានុប្បវត្ដិ Nature Communications បានរកឃើញថា ការរលាយទឹកកកនៅកោះហ្រ្គោអង់ឡង់ បានកើនឡើង២១ភាគរយ ក្នុងរយៈពេល៤០ឆ្នាំចុងក្រោយនេះ ខណៈការរលាយមានការប្រែប្រួលប្រមាណ៦០ភាគរយ ក្នុងចន្លោះពីរដូវក្តៅមួយ ទៅរដូវក្តៅបន្ទាប់។ ការរលាយទឹកកកនេះបានធ្វើឱ្យកម្ពស់ទឹកសមុទ្រកើនឡើង ដែលជាកត្តាបង្កើនហានិភ័យនៃទឹកជំនន់ចំពោះប្រទេសឆ្នេរសមុទ្រទូទាំងពិភពលោក។
ក្នុងរយៈពេលមួយទសវត្សរ៍កន្លងមកនេះ ទឹកកកចំនួន៣,៥ទ្រីលានតោន បានរលាយចេញពីផ្ទៃកោះរបស់ដាណឺម៉ាកមួយនេះ ហើយហូរចូលទៅក្នុងមហាសមុទ្រ។ ទឹកដែលបានរលាយពីទឹកកកទាំងនោះមានចំណុះច្រើនគ្រប់គ្រាន់អាចគ្របដណ្តប់អង់គ្លេសទាំងមូលឱ្យស្ថិតក្រោមជម្រៅទឹក១៥ម៉ែត្រ ឬអាចគ្របដណ្តប់ទីក្រុងញូវយ៉កទាំងមូលឱ្យស្ថិតក្រោមជម្រៅទឹក៤៥០០ម៉ែត្រ។
ការស្រាវជ្រាវបានបង្ហាញថា ក្នុងរយៈពេល១០ឆ្នាំចុងក្រោយ ទឹកកកដែលរលាយពីហ្រ្គោអង់ឡង់ បានបង្កើនកម្ពស់ទឹកសមុទ្រទូទាំងពិភពលោកមួយសង់ទីម៉ែត្រ។ ប៉ុន្តែមួយភាគបីនៃកម្ពស់ទឹកដែលបានកើននេះ គឺបានកើតក្នុងរដូវក្តៅចំនួន២ប៉ុណ្ណោះ ពោលគឺឆ្នាំ ២០១២ និង២០១៩។ ឆ្នាំទាំងពីរនេះមានអាកាសធាតុក្តៅខ្លាំង ដែលបំបែកកំណត់ត្រានៃការរលាយទឹកកកខ្លាំងជាងគេបង្អស់ក្នុងរយៈពេល ៤០ឆ្នាំកន្លងមក។
លោក Amber Leeson សហអ្នកនិពន្ធការស្រាវជ្រាវ និងជាសាស្ត្រាចារ្យជាន់ខ្ពស់ផ្នែកទិន្នន័យវិទ្យាសាស្ត្របរិស្ថាននៃសាកលវិទ្យាល័យ Lancaster ព្រមានថា ការរលាយទឹកកកនៅកោះហ្រ្គោអង់ឡ់ង នឹងបន្តធ្វើឱ្យកម្ពស់ទឹកសមុទ្រក្នុងពិភពលោកកើនឡើងចាប់ពី៣ ទៅដល់ ២៣សង់ទីម៉ែត្រ នៅត្រឹមឆ្នាំ២១០០ ប្រសិនបើផែនដីនៅតែបន្តកើនកម្តៅទៀតនោះ។
សូមបញ្ជាក់ថា ការលាយទឹកកកនៅហ្រ្គោអង់ឡង់ មិនត្រឹមតែបង្កើនកម្ពស់ទឹកសមុទ្រ ប៉ុណ្ណោះទេ វាក៏បានរំខានដល់ប្រព័ន្ធជីវចម្រុះក្នុងមហាសមុទ្រអាក់ទិក ដែលជាប្រភពអាហាររបស់ជនជាតិដើមរស់នៅទីនោះ។ លើសពីនេះ វាអាចផ្លាស់ប្ដូរចរន្តទឹកសមុទ្រ និងបរិយាកាសដែលអាចបង្កផលប៉ះពាល់ដល់លក្ខខណ្ឌអាកាសធាតុភពផែនដីផងដែរ៕
© រក្សាសិទ្ធិដោយ thmeythmey.com