អន្តរជាតិ
របាយការណ៍៖ ចិន មានសមត្ថភាពបាញ់មីស៊ីលមួយផ្សេងចេញពីមីស៊ីលលឿនជាងសំឡេង មីស៊ីលល្បឿនលឿន DF-17 របស់ចិនក្នុងពិធីដង្ហែកន្លងមក។ រូបថត Xinhua
× កាលពីខែកក្កដា ចិន បានបាញ់មីស៊ីលល្បឿនលឿនជាងសំឡេងដែលធ្វើឱ្យអាម៉េរិកភ្ញាក់ផ្អើលខ្លាំង។ រឹតតែភ្ញាក់ផ្អើលនោះ មីស៊ីលលឿនជាងសំឡេងនេះ បានបញ្ចេញមីស៊ីលមួយផ្សេងខណៈកំពុងហោះហើរក្នុងល្បឿនដ៏លឿន។ កាសែត The Financial Times និង The Wall Street Journal ចេញផ្សាយបែបនេះថ្ងៃទី២២ ខែវិច្ឆិកា។ ចំពោះបច្ចេកវិទ្យារបៀបចុងក្រោយនេះ អាម៉េរិក និងរុស្ស៊ីនៅមិនទាន់មាននៅឡើយ។
បើតាមកាសែតទាំងពីរ ការបាញ់មីស៊ីលចេញពីមីស៊ីលល្បឿនលឿនជាងសំឡេង បង្ហាញពីភាពជឿនលឿននៃការអភិវឌ្ឍរបស់ចិនក្នុងការផលិតអាវុធយុទ្ធសាស្ត្រ និងអាវុធនុយក្លេអ៊ែររបស់ចិនដែលលើសពីការរំពឹងទុករបស់គូប្រទេស។ សូម្បីមន្ត្រីមន្ទីរបញ្ចកោណក៏បានភ្ញាក់ផ្អើលចំពោះសមត្ថភាពរបស់ចិនក្នុងការបង្កើតអាវុធបច្ចេកវិទ្យាទំនើបនេះផងដែរ។
កាសែត The Financial Times ដែលរាយការណ៍ពីការសាកល្បងនេះនៅចុងសប្ដាហ៍មុន សរសេរថា អ្នកជំនាញយោធាអាម៉េរិក កំពុងតែសិក្សាអំពីរបៀបដែលចិនអាចទទួលបានបច្ចេកវិទ្យាដ៏ជឿនលឿនមួយនេះ។ កាសែត The Wall Street Journal ក៏បានបញ្ជាក់ពីការសាកល្បងនេះដែរនៅថ្ងៃទី២២ ខែវិច្ឆិកា។
ក្នុងការតេស្តនេះ មីស៊ីលល្បឿនលឿនជាងសំឡេង បានបញ្ចេញមីស៊ីលដោយឡែកមួយទៀត បាញ់ចេញទៅគោលដៅឆ្ងាយមួយ ហើយធ្លាក់ចូលសមុទ្រចិនខាងត្បូងដោយមិនមានបង្កគ្រោះថ្នាក់អ្វីឡើយ។ មីស៊ីលខាងក្នុងត្រូវបានបាញ់បញ្ចេញនៅពេលដែលមីស៊ីលល្បឿនលឿនជាងសំឡេងដែលផ្ទុកមីស៊ីលនោះ កំពុងហោះក្នុងល្បឿនលើស៦,១៧៥គីឡូម៉ែត្រក្នុងមួយម៉ោង។
ចំពោះសក្តានុពលរបស់មីស៊ីលដែលត្រូវបានបញ្ចេញនោះមិនទាន់មានការបញ្ជាក់ច្បាស់ថាយ៉ាងណានោះទេ។ ប៉ុន្តែមីស៊ីលនេះអាចត្រូវបានប្រើដើម្បីកំណត់គោលដៅសត្រូវ ឬគេចពីប្រព័ន្ធការពាររបស់សត្រូវ។
គួរបញ្ជាក់ថា ទាំងអាម៉េរិក ទាំងរុស្ស៊ីមិនទាន់មានសមត្ថភាពដូចចិននោះទេសម្រាប់ការបាញ់មីស៊ីលមួយចេញពីមីស៊ីលលឿនជាងសំឡេងបែបនេះ។ បច្ចេកវិទ្យាមីស៊ីលខាងលើនេះអាចធ្វើឱ្យចិននាំមុខគូប្រជែងនៅក្នុងការប្រណាំងអាវុធលឿនជាងសំឡេង។ ឧត្តមសេនីយ៍ John Hyten ប្រាប់ទូរទស្សន៍ CBS កាលពីសប្ដាហ៍មុន ការសាកល្បងរបស់ចិនក្នុងខែកក្កដា និងនៅបីសប្ដាហ៍មុននេះ គួរតែជាសញ្ញាបន្ទាន់សម្រាប់អាម៉េរិក៕
© រក្សាសិទ្ធិដោយ thmeythmey.com