លោក ហ៊ុន ម៉ានី៖ អនាគតសង្គមជាតិ និងសុភមង្គលពលរដ្ឋ មិនអាចបណ្ដោយតាមយថាហេតុឡើយ

ជាតិ

នយោបាយជាតិ

លោក ហ៊ុន ម៉ានី៖ អនាគតសង្គមជាតិ និងសុភមង្គលពលរដ្ឋ មិនអាចបណ្ដោយតាមយថាហេតុឡើយ

26, Nov 2021 , 11:59 am

រូបភាព

លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាតំណាងរាស្រ្តមណ្ឌលកំពង់ស្ពឺ

ដោយ: ធឿន បញ្ញាឬទិ្ធ

ភ្នំពេញ៖ ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បាននិយាយថា ការរៀបចំទិសដៅសម្រាប់សង្គមជាតិ និងក្តីសុខប្រជាពលរដ្ឋនោះ មិនអាចរំពឹងទៅលើភាពចៃដន្យ ដែលមិនអាចមើលឃើញនោះឡើយ។

តាមរយៈហ្វេសប៊ុកខ្លួន លោក ហ៊ុន ម៉ានី តំណាងរាស្ត្រមណ្ឌលកំពង់ស្ពឺរូបនេះ បានជំរុញឱ្យយុវជនជំនាន់ក្រោយ ត្រូវមានភាពទទួលខុសត្រូវខ្ពស់ និងការចូលរួមកិច្ចការងារសង្គម ដើម្បីអភិវឌ្ឍន៍ឲ្យបានច្រើន។ «អនាគតរបស់សង្គមជាតិ និងសុភមង្គលរបស់ប្រជាជន គឺមានសារៈសំខាន់បំផុត ដែលមិនអាចបណ្តោយ ទៅតាមយថាហេតុ ឬឲ្យមានភាពចៃដន្យណាមួយកើតឡើងធ្វើឲ្យប៉ះពាល់នោះទេ។ ប្រាកដណាស់ ពេលនេះ ពេលដែលកម្ពុជារីករាយនឹងសន្តិភាព ស្ថិរភាព, វាក៏ជាពេលដែលយុវជនកម្ពុជាត្រូវតែគិតបន្ថែមទៀតអំពីតួនាទី ទំនួលខុសត្រូវ និងការចូលរួមចំណែករបស់ខ្លួនដើម្បីសង្គមជាតិ និងប្រជាជន»។ នេះជាសាររបស់ប្រធានសហភាពសហព័ន្ធយុវជនកម្ពុជា នាថ្ងៃទី២៦ វិច្ឆិកា។

សហភាពសហព័ន្ធយុវជនកម្ពុជា នឹងរៀបចំកម្មវិធីខួបឆ្នាំទី៤៣របស់ខ្លួន នៅព្រឹកថ្ងៃអាទិត្យ ទី២៨ខែវិច្ឆិកា ឆ្នាំ២០២១ នៅអគារខេមរានីក្នុងសង្កាត់ព្រែកលាភ។មនុស្សប្រមាណ២០០នាក់ដែលជាសមាសភាពថ្នាក់ដឹកនាំ ជាសមាជិកគណៈកមា្មធិការកណ្ដាល និងជាតំណាងសមាជិកនីតិបុគ្គល នឹងចូលរួមអបអរកម្មវិធីរយៈពេលមួយព្រឹកដែលនឹងត្រូវផ្សព្វផ្សាយផ្ទាល់ផងតាមរយៈទូរទស្សន៍ព័ត៌មាន BTV។

សហភាពសហព័ន្ធយុវជនកម្ពុជា ត្រូវបានប្តូរឈ្មោះពី សមាគមយុវជនកម្ពុជានៅឆ្នាំ២០១២ ដែលមានឋានៈជាអង្គការមិនមែនរដ្ឋាភិបាលមួយ។តាមពិត សមាគមយុវជនកម្ពុជា មានឈ្មោះដើមជា សមាគមយុវជនសង្គ្រោះជាតិកម្ពុជាដែលត្រូវបានបង្កើតឡើងទន្ទឹមគ្នានឹងរណសិរ្សសាមគ្គីសង្គ្រោះជាតិកម្ពុជានៅថ្ងៃទី២ខែធ្នូឆ្នាំ១៩៧៨។ កាលណោះ សមមិត្ត ហ៊ុន សែន ដែលជាស្ថាបនិកមួយរូបនៃរណៈសិរ្ស គឺជាអ្នកទទួលបន្ទុកលើការងារយុវជននេះ៕

អត្ថបទទាក់ទង

ចលនាយុវជន ដ៏ធំប្រារព្ធខួបកំណើត៤៣ឆ្នាំ