បាក់ដើមឈើ បណ្ដាលឱ្យខូចប្រាសាទមួយកន្លែងធ្ងន់ធ្ងរ ក្នុងខេត្តកំពត

ជាតិ

សង្គមជាតិ

បាក់ដើមឈើ បណ្ដាលឱ្យខូចប្រាសាទមួយកន្លែងធ្ងន់ធ្ងរ ក្នុងខេត្តកំពត

26, Nov 2021 , 5:50 pm

រូបភាព

បាក់ដើមឈើ បណ្ដាលប្រាសាទវត្តប្រាសាទ ខេត្តកំពត ខូចខាតធ្ងន់ធ្ងរ។ រូបភាពពី មន្ទីរវប្បធម៌ និងវិចិត្រសិល្បៈខេត្តកំពត។

ដោយ: ស៊ុល រ៉វី

ស៊ុល រ៉វី កំពត៖ ប្រាសាទវត្តប្រាសាទ ស្ថិតក្នុងភូមិប្រាល ឃុំតានី ស្រុកអង្គរជ័យ ខេត្តកំពត រងការខូចខាតធ្ងន់ធ្ងរ បណ្ដាលមកពីការបាក់រលំដើមឈើចំពីលើ នាវេលាម៉ោង១០ព្រឹក នាថ្ងៃទី២៦ ខែវិច្ឆិកា ឆ្នាំ២០២១។ បើតាមប្រធានមន្ទីរវប្បធម៌ និងវិចិត្រសិល្បៈខេត្តកំពត អាជ្ញាធរបានដកដើមឈើនោះចេញ ខណៈមិនបានបង្កគ្រោះថ្នាក់ដល់ពលរដ្ឋឡើយ។

តួប្រាសាទប៉ែកខាងលិចប្រាសាទ បានរងការខូចខាតធ្ងន់ធ្ងរ។ បើតាមលោក គង់ ផល្លា ប្រធានមន្ទីរវប្បធម៌ និងវិចិត្រខេត្តកំពត ការបាក់រលំដើមឈើនេះ បណ្ដាលមកពីដើមឈើនោះពុកផុយ (ដើមអាចម៍ដែក)។

ថ្លែងប្រាប់សារព័ត៌មានថ្មីៗ២៥រាជធានី-ខេត្ត លោក គង់ ផល្លា និយាយដូច្នេះថា៖ «មុនបាក់ហ្នឹង ការពិតទៅក្រសួងក៏បានបញ្ជូនមន្ត្រីជំនាញបានចុះមកវាយតម្លៃរួចហើយ ថាដើមនោះ និងដួលរំលំឆាប់ៗ។ ប៉ុន្តែវាបែរជាបាក់មុន បន្ទាប់ពីវាយតម្លៃហើយហ្នឹង។ តែសំណាងល្អ ដែលមិនមានគ្រោះថ្នាក់ ដល់ប្រជាពលរដ្ឋយើងទេ»។

បើតាមប្រធានមន្ទីរវប្បធម៌ដដែល ក្រោយការបាក់រំលំនេះ មកទល់វេលាល្ងាចថ្ងៃទី២៦ ខែវិច្ឆិកា ឆ្នាំ២០២១ មន្ត្រីជំនាញបានដកហូតដើមឈើរួចរាល់ ក្រោមកិច្ចសហការណ៍រវាងមន្ទីរវប្បធម៌ខេត្ត និងមន្ទីរសាធារណការ និងដឹកជញ្ជូនខេត្តកំពត។ លោកបន្ថែមថា៖«ជំហានទី១ យើងកាត់ដើមឈើចេញសិន កុំឱ្យប៉ះពាល់ទៅផ្នែកផ្សេងៗទៀត, ទី២យើងប្រមូលឥដ្ឋដែលបាក់បែកហ្នឹង ទុកវាមួយដុំ ដើម្បីរកថវិកាជួសជុលឡើងវិញ»។

លោក គង់ ផល្លា ប្រាប់ថា សប្ដាហ៍ក្រោយ មន្ត្រីជំនាញនឹងចុះទៅវាយតម្លៃទំហំនៃការខូចខាត និងដាក់ស្នើគម្រោងជួសជុលប្រាសាទនេះ៕