កីឡាអន្តរជាតិ
អន្តរជាតិ
លោក Williams ស្ថាបនិកក្រុម Williams នៃក្របខណ្ឌ F1 ទទួលមរណភាពក្នុងអាយុ៧៩ឆ្នាំ
× លោក Sir Frank Williams ស្ថាបនិក និងជាអតីតប្រធានក្រុមប្រណាំងរថយន្ត Williams Racing នៃក្របខណ្ឌ Formula One ទទួលមរណភាពនៅអាយុ ៧៩ ឆ្នាំ។ Lewis Hamilton លើកសរសើរពីវីរភាព និងកេរដំណែលរបស់លោក Williams ក្នុងសារគោរពវិញ្ញាណក្ខន្ធមួយ។
លោក Williams បានបង្កើតក្រុមប្រណាំង Williams នៅឆ្នាំ១៩៦៦ ដោយដឹកនាំក្រុមនេះឈ្នះជើងឯក F1 ៧សម័យ និងឈ្នះផ្នែកគ្រឿងម៉ាស៊ីន៩លើក ចន្លោះឆ្នាំ១៩៨០ ដល់ឆ្នាំ១៩៩០។
យ៉ាងណានៅខែកញ្ញា ឆ្នាំ២០២០ អតីតកីឡាករ និងជាអ្នកជំនួញអង់គ្លេស បានចាកចេញពីវិស័យកីឡាប្រណាំងរថយន្តលំដាប់ពិភពលោកនេះ បន្ទាប់ពីលក់ Williams ទៅឱ្យអ្នកវិនិយោគអាមេរិក។
នៅឆ្នាំ២០២១ នាថ្ងៃទី២៩ ខែវិច្ឆិកា Sir Frank Williams ត្រូវបានប្រកាសពីមរណភាព ក្រោយបញ្ជូនទៅកាន់មន្ទីរពេទ្យ។ ក្រុមការងារ Williams បង្ហាញការសោកស្តាយ បន្ទាប់ពីស្ថាបនិក និងជាអតីតប្រធានក្រុម Williams Racing លាចាកលោកនៅអាយុ៧៩ឆ្នាំ។
Hamilton ម្ចាស់ជើងឯក F1 ៧សម័យកាល បានសរសេរសារគោរពវិញ្ញាណក្ខន្ធទៅកាន់សពលោក Williams។ អ្នកប្រណាំងអង់គ្លេស វ័យ៣៦ឆ្នាំបានពិពណ៌នាពីវីរភាពរបស់ Williams លើបណ្តាញសង្គម Twitter ថា៖ «លោក Frank Williams ជាមនុស្សសប្បុរសបំផុតក្នុងវិស័យកីឡាប្រណាំងរថយន្ត។ អ្វីដែលគាត់សម្រេចបានគឺពិសេសខ្លាំងណាស់។ រហូតដល់ថ្ងៃចុងក្រោយរបស់គាត់ ខ្ញុំដឹងថាគាត់នៅតែជាអ្នកប្រណាំង និងជាអ្នកប្រយុទ្ធនៅក្នុងបេះដូងរបស់គាត់។ មរតករបស់ Williams នឹងស្ថិតនៅជារៀងរហូត»។
លោក Stefano Domenicali នាយកប្រតិបត្តិ Formula One បានចូលរួមគោរពវិញ្ញាណក្ខន្ធ និងបង្ហាញការសោកស្តាយដែលគ្រួសារ F1 បានបាត់បង់សមាជិកជាទីស្រឡាញ់ និងគួរឱ្យគោរពដូចជា Williams៕
Tag:
Formula One
Sir Frank Williams)
© រក្សាសិទ្ធិដោយ thmeythmey.com