COVID-19
ជាតិ
លោក ឃួង ស្រេង អនុញ្ញាតឲ្យអាជីវកម្មខារ៉ាអូខេ រង្គសាល និងឌីស្កូតែក ដំណើរការឡើងវិញហើយ
× លោក ឃួង ស្រេង អភិបាលរាជធានីភ្នំពេញ បានចេញសេចក្តីសម្រេចអនុញ្ញាតឲ្យបើកដំណើរការឡើងវិញចំពោះអាជីវកម្មខារ៉ាអូខេ រង្គសាល និងឌីស្កូតែក នៅរាជធានីភ្នំពេញ ចាប់ពីថ្ងៃទី៣០ខែវិច្ឆិកា ឆ្នាំ២០២១ នេះ តាមគម្លងប្រក្រតីភាពថ្មី។ តាមសេចក្តីសម្រេចថ្មីនេះ មានន័យថា អាជីវកម្មខារ៉ាអូខេ រង្គសាល និងឌីស្កូតែក មិនចាំបាច់រង់ចាំរហូតដល់ក្រោយថ្ងៃទី៥ ខែធ្នូ នោះឡើយ។
ក្នុងសេចក្តីសម្រេចរបស់ខ្លួន អភិបាលរាជធានីភ្នំពេញ បានប្រាប់ទៅម្ចាស់ទីតាំង និងម្ចាស់អាជីវកម្មពាក់ព័ន្ធទាំងនោះ ឲ្យចាត់តាំងបុគ្គលិកប្រចាំការមុខច្រកចេញចូលដើម្បីត្រួតពិនិត្យបណ្ណចាក់វ៉ាក់សាំង និងការអនុវត្តវិធានការសុខាភិបាលផ្សេងៗ។
ចំពោះករណីល្មើស រដ្ឋបាលនឹងចាត់វិធានការដកហូតអាជ្ញាបណ្ណ ឬលិខិតអនុញ្ញាត និងឈានដល់ការបិទទីតាំងទាំងស្រុង។ រីឯបុគ្គលល្មើស នឹងត្រូវអនុវត្តទណ្ឌកម្មរដ្ឋបាល ច្បាប់ រួមទាំងការផ្សព្វផ្សាយជាសាធារណៈចំពោះបុគ្គលល្មើសទាំងនោះ។
សេចក្តីសម្រេចរបស់រដ្ឋបាលរាជធានីភ្នំពេញ កាលពីថ្ងៃទី២៩ ត្រូវចាត់ទុកជានិរាករណ៍៕
© រក្សាសិទ្ធិដោយ thmeythmey.com