កីឡាជាតិ
ជាតិ
ព្រឹត្តិការណ៍ប្រណាំងកង់ភ្នំឡើងវិញ ក្រោយខនខានមួយឆ្នាំ ដោយសារកូវីដ-១៩ លោក Pierre Yves Catry ស្ថាបនិកប្រណាំងកង់ភ្នំ រៀបចំការប្រកួតប្រណាំងកង់មួយ ដើម្បីឲ្យកីឡាករ និងកីឡាការិនីជម្រើសជាតិ អាចដកស្រង់បទពិសោធន៍ និងបង្កើនបច្ចេកទេស
× លោក Pierre Yves Catry ស្ថាបនិកប្រណាំងកង់ភ្នំ រៀបចំការប្រកួតប្រណាំងកង់មួយ ដើម្បីឲ្យកីឡាករ និងកីឡាការិនីជម្រើសជាតិ អាចដកស្រង់បទពិសោធន៍ និងបង្កើនបច្ចេកទេស ត្រៀមចូលរួមប្រកួតប្រជែង មេដាយនៅស៊ីហ្គេម នៅប្រទេសវៀតណាម និងស៊ីហ្គេម២០២៣ ដែលកម្ពុជាធ្វើជាម្ចាស់ផ្ទះ។ ការៀបចំប្រណាំងនេះ ត្រូវបានរៀបចំនៅទីតាំងភូមិសាស្រ្តរាជធានីភ្នំពេញ និងកំពង់ស្ពឺ ។
លោក Pierre Yves Catry បានបង្កើតព្រឹត្តិការណ៍ប្រណាំងកង់ Mountain Bike Series នៅកម្ពុជា ប្រហែលជា១០ឆ្នាំហើយ គិតតាំងពីឆ្នាំ២០១១ ដល់ ២០២១។ តាមរយៈព្រឹត្តិការណ៍មួយនេះ បានបើកឱកាស និងជួយឲ្យកីឡាករ និងកីឡាការីនី ទទួលបានបទពិសោធន៍ និងបច្ចេកទេស។ ជាពិសេសកីឡាករខ្លះ ក៏ទទួលបានចូលរួមបង្ហាញខ្លួនលើឆាកអន្ដរជាតិផងដែរ ។
ការប្រណាំងកង់ភ្នំនេះ ត្រូវបានខកខានមួយឆ្នាំមកហើយ ដោយសារតែវិបត្តិកូវីដ-១៩ ។ សម្រាប់ព្រឹត្តិការណ៍ប្រណាំងកង់ភ្នំនេះ គណៈកម្មការរៀបចំការប្រកួត សម្រេចរៀបចំតែ៣ជុំតែប៉ុណ្ណោះ ដើម្បីបង្រួមការប្រកួត និងទប់ស្កាត់ការឆ្លងកូវីដ-១៩ ។ ចំពោះជុំទី១ កាលពីថ្ងៃទី២៨ ខែវិច្ឆិកា ឆ្នាំ២០២១ ប្រកួតនៅទីលានភ្នំជាល ខេត្តកំពង់ស្ពឺ, ជុំទី២ នៅព្រែកលៀប រាជធានីភ្នំពេញ នាថ្ងៃទី១២ ខែធ្នូ ឆ្នាំ២០២១ និងទី៣ កំពូលភ្នំគីរីរម្យ នាថ្ងៃទី១៦ ខែមករា ឆ្នាំ២០២២ ខាងមុខ ។
តែទោះបីជាយ៉ាងនេះក្តី អ្នកចូលរួមប្រណាំងកង់ Mountain Bike Series ច្រើនលើសការរំពឹងទុក នៅក្នុងទីលានភ្នំជាល ខេត្តកំពង់ស្ពឺ កាលពីជុំទីមួយ ។ អ្នកចូលរួមប្រកួត មាន៤៧៨នាក់ ច្រើនជាងឆ្នាំ២០១៩ ដែលមានចំនួនសរុប ៣៥០នាក់ ។ នេះបញ្ជាក់ឲ្យឃើញថា ចំនួននៃអ្នកដែលចូលចិត្ត កីឡាទោចក្រយាន្ត មានការកើនឡើង បើទោះជាខកខាន ដោយបញ្ហាកូវីដ១៩ ក៏ដោយ ៕
© រក្សាសិទ្ធិដោយ thmeythmey.com