អន្តរជាតិ
អាម៉េរិកនិងសហភាពអឺរ៉ុប បារម្ភពីសកម្មភាពឯកតោភាគីរបស់ចិននៅសមុទ្រចិនខាងត្បូង អនុរដ្ឋមន្រ្តីការបរទេសអាម៉េរិក Wendy Sherman ។ រូបថត AFP
× អាម៉េរិក និងសហភាពអឺរ៉ុប ក្នុងសេចក្ដីថ្លែងការណ៍រួមគ្នាមួយនៅថ្ងៃទី២ ខែធ្នូ បានបង្ហាញការព្រួយ បារម្ភយ៉ាងខ្លាំងចំពោះសកម្មភាពដែលបង្កជាបញ្ហា និងឯកតោភាគីរបស់ចិននៅសមុទ្រចិនខាងត្បូង។ ដៃគូទាំងពីរនេះ ក៏សង្កត់ធ្ងន់លើតម្រូវការទំនាក់ទំនងគ្នាជិតស្និទ្ធបន្ថែមទៀតដើម្បីគ្រប់គ្រងការប្រកួតប្រជែងជាមួយទីក្រុងប៉េកាំង។
សេចក្តីថ្លែងការណ៍រួមអាម៉េរិក និងអឺរ៉ុប បានធ្វើឡើងបន្ទាប់ពីជំនួបនៅទីក្រុងវ៉ាស៊ីនតោនរវាងអនុរដ្ឋមន្ត្រីការបរទេសអាម៉េរិក Wendy Sherman និងអគ្គលេខាធិការទទួលបន្ទុកកិច្ចការបរទេសរបស់អឺរុប Stefano Sannino ។
ភាគីទាំងពីរសង្កត់ធ្ងន់ពីសារសំខាន់នៃការបន្តទំនាក់ទំនងជិតស្និទ្ធរវាងអាម៉េរិក និងសហភាពអឺរ៉ុបលើការជ្រើសរើសវិធីសាស្ត្រលើការវិនិយោគពង្រីកសេដ្ឋកិច្ច និងកិច្ចសហការជាមួយចិន ក៏ដូចជាគ្រប់គ្រងការប្រកួតប្រជែងជាប្រព័ន្ធជាមួយចិនដោយការទទួលខុសត្រូវផងដែរ។
បន្ថែមពីនេះ លោកស្រី Sherman និងលោក Stefano Sannino និយាយដល់សកម្មភាពដែលបង្កបញ្ហា និងឯកតោភាគីរបស់ចិននៅក្នុងសមុទ្រចិនខាងត្បូង សមុទ្រចិនខាងកើត និងច្រកសមុទ្រតៃវ៉ាន់។ មន្រ្តីទាំងពីរយល់ថា សកម្មភាពនេះ បំផ្លាញសន្តិភាព និងសន្តិសុខក្នុងតំបន់ ហើយក៏បានប៉ះពាល់ផ្ទាល់ដល់សន្តិសុខ និងការរីកចម្រើនរបស់អាម៉េរិក និងសហភាពអឺរ៉ុបនៅក្នុងតំបន់ដែរ។
សេចក្តីថ្លែងការណ៍ដដែល បញ្ជាក់ថាភាគីទាំងពីរបានពិភាក្សាពីការរំលោភបំពានសិទ្ធិនៅចិន រួមមាន ការគាបសង្កត់សិទ្ធិជនភាគតិចនៅតំបន់ស៊ីនជាំង និងទីបេ ព្រមទាំងការលុបបំបាត់ស្វ័យភាពនៅហុងកុងជាដើម។
ភាគីទាំងពីរក៏បានអះអាងថា ពួកគេបានត្រៀមខ្លួនរួចជាស្រេចក្នុងការពង្រឹងការចែករំលែកព័ត៌មានណាដែលមិនពិត និងត្រូវគាំទ្រដោយភាគីចិន៕
© រក្សាសិទ្ធិដោយ thmeythmey.com