អាម៉េរិកជាប្រទេសដំបូងគេដែលប្រកាសមិនបញ្ជូនមន្រ្តីរដ្ឋាភិបាលខ្លួនទៅចូលរួមព្រឹត្តិការណ៍កីឡាអូឡាំពិករដូវរងាដែលចិនធ្វើជាម្ចាស់ផ្ទះនាខែកុម្ភៈឆ្នាំ២០២២ ខាងមុខ។ អាម៉េរិកយោងលើបញ្ហារំលោភសិទ្ធិមនុស្សលើជនជាតិភាគតិចនៅតំបន់ស៊ីនជាំង​ជាមូលហេតុសំខាន់នាំឱ្យមានការធ្វើពហិការនេះ។ អូស្ត្រាលី ក៏ចូលរួមមិនបញ្ជូនមន្រ្តីទៅអូឡាំពិកប៉េកាំងដែរ។
 

នៅថ្ងៃទី៨ ខែធ្នូ សម្ព័ន្ធមិត្តអាម៉េរិកពីរទៀតមានអង់គ្លេស និងកាណាដា ក៏ប្រកាសធ្វើពហិការដែរ បើទោះជាចិនព្រមានពីផលវិបាកក្ដី។ នាយករដ្ឋមន្រ្តីកាណាដា ចាស្ទីន ទ្រូដូ​ និយាយថា ក្រុងប៉េកាំងត្រូវតែដឹងអំពីក្តីបារម្ភរបស់លោកខាងលិចលើបញ្ហាសិទ្ធិមនុស្សក្នុងទឹកដីចិន។ ដូច្នោះចិនគួរភ្ញាក់ផ្អើលទេដែលកាណាដា មិនបញ្ជូនមន្រ្តីទៅកាន់ព្រឹត្តិការណ៍អូឡាំពិកនោះ។

ក្រោយការប្រកាសរបស់ប្រមុខរដ្ឋាភិបាលកាណាដា អ្នកនាំពាក្យស្ថានទូតចិនប្រចាំកាណាដា ក៏ប្រតិកម្មវិញដែរ។​ 
 

«ផ្អែកលើភាពមនោគមវិជ្ជា​ ការកុហក និងពាក្យចចាមអារ៉ាម កាណាដានិងប្រទេសលោកខាងលិចមួយចំនួន បានចូលរួមកលល្បិចនយោបាយដោយព្យាយាមរំខានដំណើរការរលូននៃកីឡាអូឡាំពិកនិងកីឡាប៉ារ៉ាឡាំពិករដូវរងាររបស់ចិន។»អ្នកនាំពាក្យបេសកកម្មចិនសរសេរបែបនេះក្នុងសេចក្តីថ្លែងការណ៍មួយ។
 

ឯអង់គ្លេសវិញ​ លោកនាយករដ្ឋមន្រ្តី បូរីស ចនសុន អះអាងថា ក៏ចូលរួមពហិការក្នុងព្រឹត្តិការណ៍កីឡាអូឡាំពិកនេះដែរដោយគ្មានមន្រ្តីណាត្រូវបានរំពឹងនឹងបញ្ជូនទៅចិនឡើយ។ ប៉ុន្តែអត្តពលិកអង់គ្លេសនឹងនៅតែចូលរួមប្រកួតប្រជែង។
 

ទាក់ទិននឹងរឿងនេះ ​ចិនថា ខ្លួនមិនបានអញ្ជើញមន្រ្តីអង់គ្លេសមកទេ៕