ក្រុមបិសាចក្រហម ដែលទើបយកឈ្នះ Norwich City ១-០ នៅជំនួបលីគសប្តាហ៍ទី១៦ នឹងត្រូវធ្វើដំណើរទៅជួប Brentford នៅរាត្រីថ្ងៃទី១៤ ខែធ្នូ។ កាសែត The Athletic ​ផ្សាយ​ថា ក្រោយត្រឡប់ពីជួបជាមួយ Norwich វិញសមាជិកក្រុមរបស់លោក Ralf Rangnick ឆ្លងជំងឺកូវីដ-១៩ជាច្រើននាក់។
 

កីឡាករ និងបុគ្គលិក Man Utd បានធ្វើតេស្តមុនពេលហ្វឹកហាត់នៅមុនជំនួបទល់ Brentford ដោយលទ្ធផលបង្ហាញថាមានវិជ្ជមានមួយចំនួន។ អ្នកតេស្តឃើញកូវីដ-១៩ មិនអាចអនុញ្ញាតឱ្យចូលហាត់ឡើយ ហើយពួកគេត្រូវនៅដាច់ដោយឡែកនៅផ្ទះរៀងខ្លួន។
 

ការផ្ទុះឡើងនៃជំងឺរាតត្បាតជាថ្មីលើសមាជិកក្រុម Man Utd បានបង្កការលំបាកសម្រាប់ក្រុម ហើយជំនួបទល់នឹង Brentford នៅយប់ស្អែកអាចនឹងផ្អាកផងដែរ។
 

កាលពីសប្តាហ៍មុន ការប្រកួតរវាង Tottenham Hotspur និង Brighton & Hove Albion ត្រូវបានផ្អាកដោយសារសមាជិកក្រុមលោក Antonio Conte រហូតដល់១៣នាក់ឆ្លងជំងឺនេះ។

អង់គ្លេសបានបង្កើនកម្រិតប្រកាសអាសន្នជំងឺកូវីដ-១៩ នៅថ្ងៃទី១២ ខែធ្នូ ដើម្បីបង្កាការរីករាលដាលយ៉ាងឆាប់រហ័សនៃវីរុសបំប្លែងខ្លួនថ្មីអូមីក្រុង៕