ក្រសួងកសិកម្ម នឹងអនុវត្តគម្រោង ជលផលតំបន់ឆ្នេរ និងសមុទ្រប្រកប ដោយនិរន្តរភាព (Sustainable Coastal and Marine Fisheries Project) ក្នុងទំហំថវិកា១០០លានដុល្លារអាម៉េរិករបស់ADB ដែលនឹងអនុម័តនៅឆ្នាំ២០២២។ គម្រោងថ្មីនេះ ​ត្រូវបានលើកឡើងក្នុងជំនួបពិភាក្សាការងាររវាងលោក វេង សាខុន រដ្ឋមន្ត្រីក្រសួងកសិកម្ម ជាមួយ លោក Anthony Gill នាយកស្តីទីនៃបេសកកម្មADBប្រចាំកម្ពុជា កាលពីថ្ងៃទី១៦ធ្នូ ឆ្នាំ២០២១។ 

 

លោក Anthony Gill ថ្លែងប្រាប់លោក វេង សាខុន  ថា ក្នុងចំណោមថវិកា១០០លានដុលា្លរ សម្រាប់អនុវត្តគម្រោង«ជលផលតំបន់ឆ្នេរ និងសមុទ្រ ប្រកបដោយនិរន្តរភាព»នេះ គឺមាន៥០លានដុល្លារ​ ជាកម្ចីរបស់ធនាគារ(ADB Loans), ១០លានដុល្លារ បានពីមូលនិធិហេដ្ឋារចនាសម្ព័ន្ធអាស៊ាន (ASEAN Infrastructure Fund), ៣០លានដុល្លារ បានពីទីភ្នាក់ងារអភិវឌ្ឍន៍បារាំង(AFD) និង១០លានដុល្លារទៀត បានពី ADB Grand Funds។
 

លោក Anthony Gill បានបន្តរៀបរាប់ថា​ គម្រោងនេះនឹងជួយស្ទួយវិស័យជនផលរបស់កម្ពុជាក្នុងការបន្ស៊ាំនិងកាត់បន្ថយដោយផ្អែកលើប្រព័ន្ធអេកូឡូស៊ីឆ្នេរសមុទ្រ និងសមុទ្រ, ជួយកែលម្អហេដ្ឋារចនាសម្ព័ន្ធក្រោយការប្រមូលផលនេសាទដែលធន់នឹងអាកាសធាតុ។ លើសពីនេះ ក៏ជួយជំរុញការវិនិយោគលើតម្លៃជលផលប្រកបដោយសុវត្ថិភាព និរន្តរភាពនិងខ្សែច្រវាក់តម្លៃរួមទាំងផ្តល់ហិរញ្ញប្បទានសម្រាប់ការគ្រប់គ្រងការនេសាទសមុទ្រ ផងដែរ។ 

 

 

បើតាម លោក វេង សាខុន គម្រោងនេះនឹងរួមចំណែកយ៉ាងសំខាន់នៅក្នុងអនុវិស័យវារីវប្បកម្ម ដោយធានាបាននូវនិរន្តរភាពបរិស្ថាន សន្តិសុខស្បៀង បង្កើនប្រាក់ចំណូល និងបង្កើនបរិមាណផលិតប្រកបដោយនិរន្តរភាព តាមរយ:ការអនុវត្តបច្ចេកវិទ្យាសមស្រប ធន់នឹងការប្រែប្រួលអាកាសធាតុ បរិយាប័ន្ន និងនវានុវត្តន៍។ 

 

ជាមួយគ្នានេះ លោក ខូវ គួង ដែលជាអនុប្រធានរដ្ឋបាលជលផលនៃក្រសួងកសិកម្ម បានប្រាប់សារព័ត៌មានThmeyThmeyតាមទូរសព្ទ នាថ្ងៃទី២០ធ្នូ ថា គម្រោង«ជលផលតំបន់ឆ្នេរ និងសមុទ្រ ប្រកបដោយនិរន្តរភាព» ដែលស្ថិតក្រោមជំនួយនិងកម្ចីចំនួន១០០លានដុល្លារពីADBនេះ គឺមានរយៈពេល៥ឆ្នាំ ដែលចាប់អនុវត្តពីឆ្នាំ២០២៣ តទៅ។ លោកបានបន្តថា តាមរយៈគម្រោងនេះ នឹងជួយដល់គ្រប់គ្រងធនធានជលផលនៅតំបន់ឆ្នេរឱ្យមានប្រសិទ្ធភាព,​ ជួយពង្រឹងសមត្ថភាពរបស់សហគមន៍នេសាទ, ជួយពង្រឹងការគ្រប់គ្រងការនេសាទខុសច្បាប់​, ជួយស្តារនិងការពារទីជម្រកជលផល ដូចជា៖ ព្រៃកោងកាងនិងស្មៅសមុទ្រ ជាដើម។

 

គម្រោងនេះក៏នឹងចូលរួមយ៉ាងសំខាន់ក្នុងការលើកកម្ពស់ខ្សែច្រវ៉ាក់ផលិតកម្មជលផល ផងដែរ។ លោក ខូវ គួង បាននិយាយដូច្នេះ៖ «យើងនឹងបង្កើនក្នុងការជួយអភិវឌ្ឍហេដ្ឋារចនាសម្ព័ន្ធរបស់វិស័យឯកជនក្រោយការប្រមូលផលនេសាទ។ ដូចជា​ កន្លែងផែនេសាទ កន្លែងខ្សែច្រវ៉ាក់ត្រជាក់ឬកន្លែងកែច្នៃ...របស់សហគ្រាសខ្នាតតូចនិងមធ្យម»។ អនុប្រធានរដ្ឋបាលជលផលរូបនេះ​ បានបញ្ជាក់ថា៖ «ការអភិវឌ្ឍហេដ្ឋារចនាសម្ព័ន្ធនេះ គឺ ដើម្បីពង្រឹងលើផលិតកម្មរបស់វិស័យឯកជនក្នុងការអនុវត្តអនាម័យ​, ការឆ្លើយតបតាមស្តង់ដារគុណភាពនិងសុវត្ថិភាពនៃផលិតផលជលផល​ ដើម្បីទទួលបានទីផ្សារល្អប្រសើរ និងអាចប្រកួតប្រជែងទីផ្សារនាំចេញបាន»។ 

 

របាយការណ៍ដែលសារព័ត៌មានថ្មីៗទទួលបានរដ្ឋបាលផល បានបង្ហាញថា ផលនៃផលិតផលជលផលសមុទ្រឆ្នាំ២០២១ កម្ពុជាទទួលបានចំនួន១២,៥ម៉ឺនតោន។ ចំនួននេះ គឺបានកើន១,៨៧ភាគរយបើធៀបនឹងឆ្នាំ២០២០។ បើតាម លោក ខូវ គួង ជាមធ្យមកម្ពុជាទទួលបានផលនៃផលិតផលជលផលសមុទ្រ ចន្លោះពី១២ទៅ១៥ម៉ឺនតោន ក្នុងមួយឆ្នាំៗ៕