កីឡាអន្តរជាតិ
អន្តរជាតិ
Xavi នៅមានសង្ឃឹមដណ្ដើមពាន La Liga ទោះឃ្លាតពី Real Madrid ឆ្ងាយ
× ការប្រកួតរវាង Barcelona និងក្រុម Sevilla ដែលបានផ្អាកម្តងរួចមកហើយ ត្រូវប្រកួតជាថ្មីនារាត្រីថ្ងៃទី ២១ឈានចូលទី២២ ខែធ្នូវេលាម៉ោង ៣:៣០ ទាបភ្លឺ(ម៉ោងនៅកម្ពុជា)។ Xavi Hernandez អះអាងថា លោកនៅតែសង្ឃឹមប្រជែងពាន La Liga ទោះនៅក្រោមក្រុមកំពូលតារាង Real Madrid ឆ្ងាយ ដ្បិតការប្រកួតនៅសល់ច្រើនដែរ។
ពេលបច្ចប្បន្ន ក្រុមអ្នកមានបុណ្យ កំពុងស្ថិតនៅចំណាត់ថ្នាក់លេខ៨ នៃ La Liga មាន២៧ពិន្ទុ ដោយមានគម្លាតពិន្ទុពីក្រុមកំពូលតារាងអធិរាជស Real Madrid ដល់ទៅ១៦ពិន្ទុ។ ទោះបីជាមានគម្លាតពិន្ទុឆ្ងាយពីក្រុមកំពូលតារាងបែបនេះ គ្រូបង្វឹកក្រុម Barcelona លោក Xavi Hernandez លើកឡើងថា មិនបោះបង់ក្តីសង្ឃឹមប្រជែងពានរង្វាន់ឡើយ។
«វាពិតជាគម្លាតពិន្ទុឆ្ងាយមែនពី Real Madrid ។ ពួកយើងមាន១៦ពិន្ទុពីក្រោយពួកគេ ប៉ុន្តែការប្រកួតលីគកំពូលនៅសល់ច្រើនប្រកួតទៀត ដូច្នេះយើងមិនអាចឱ្យរបូតពិន្ទុទៀតឡើយ។» Xavi និយាយបែបនេះក្នុងសន្និសីទការសែតមុនការប្រកួតទល់ Sevilla។
មុនការប្រកួតយប់នេះវិញ Xavi សរសើរក្រុម Sevilla ពីភាពខ្លាំងក្លារបស់ពួកគេដោយក្រុមពួកគេកំពុងសម្លឹងមើលឱកាសប្រជែងពានរង្វាន់ផងដែរក្នុងរដូវកាលនេះ។
«Sevilla ពួកគេបានត្រៀមខ្លួនរួចរាល់សម្រាប់ពានរង្វាន់ La Liga រដូវកាលនេះ ហើយកាលពីឆ្នាំមុន ពួកគេបានក្លាយជាក្រុមលេខ៣បន្ទាប់ពី Real Madrid លេខ២ និង Atletico Madrid ជាម្ចាស់ពាន La Liga។ Sevilla ពិតជាក្រុមដ៏ខ្លាំងមួយនៅពេលនេះ។ រដូវកាលនេះពួកគេកំពុងតែឈរពីក្រោយក្រុមកំពូលតារាង Real Madrid ត្រឹមតែ៦ពិន្ទុប៉ុណ្ណោះ។»Xavi បានបន្ថែមបែបនេះ៕
Tag:
Xavi Hernandez
Barcelona
© រក្សាសិទ្ធិដោយ thmeythmey.com