វិទ្យាស្ថានកីឡាអូស្ត្រាលី (AIS) បានប្តេជ្ញាផ្តល់មូលនិធិសម្រាប់អូឡាំពិកក្នុងរយៈពេល៤ឆ្នាំ ដោយឱ្យស្ថាប័នកីឡា និងអត្តពលិកបង្កើនគម្រោងទុកជាមុនជាជាងក្នុងរយៈពេលខ្លី។
 

AIS បានលើកឡើងក្នុងសេចក្តីប្រកាសរបស់ខ្លួនថា ប្រាក់ឧបត្ថម្ភបន្ថែម១០លានដុល្លារក្នុងមួយឆ្នាំជាជំនួយបុគ្គល និងការបែងចែកប្រចាំឆ្នាំរបស់រដ្ឋាភិបាលអូស្ត្រាលីចំនួន៥៩លានដុល្លារទៀត។ គោលដៅរបស់អ្នកផ្តល់ជំនួយ គឺចង់ឱ្យអ្នកទទួលជំនួយកំណត់គោលដៅលើកីឡានិមួយៗឱ្យបានជាក់លាក់ ដើម្បីឆ្ពោះទៅប្រជែងមេដាយដោយគុណភាព។ នេះបើតាមការផ្សាយរបស់ទីភ្នាក់ងារព័ត៌មាន Reuters។
 

លោក Peter Conde នាយកប្រតិបត្តិរបស់ AIS អះអាងថា ការប្តេជ្ញាចិត្តផ្តល់មូលនិធិនេះ អាចធ្វើទៅបានដោយសារតែជំនឿ និងទំនុកចិត្តដែលរដ្ឋាភិបាលអូស្ត្រាលី មាននៅក្នុងកីឡាអូស្ត្រាលី។
 

«ការប្រកួតកីឡាអូឡាំពិកក្រុងតូក្យូ និងប៉ារ៉ាឡាំពិកបានបំផុសគំនិតយើងទាំងអស់គ្នា ហើយយើងបានធ្វើការជាមួយរដ្ឋាភិបាលដើម្បីទទួលបានមូលនិធិរយៈពេលវែងដើម្បីឆ្ពោះទៅមុខ និងបន្តការកសាងផែនការដើម្បីភាពជោគជ័យ»។ នេះជាការបញ្ជាក់របស់លោក Conde។
 

កីឡាបាល់ឱបស្ត្រី ប្រណាំងទូក វាយកូនបាល់ ជិះស្គី និងប៉ារ៉ាកាណូ ស្ថិតក្នុងចំណោមកីឡាដែលនឹងត្រូវកំណត់គោលដៅជាមួយនឹងថវិកាបន្ថែមនេះ។​ កីឡាទាំង៥នេះ ជាប្រភេទកីឡាដែលអូស្ត្រាលីសម្លឹងរកការឈ្នះមេដាយ ទាំងនៅប៉ារីសឆ្នាំ២០២៤ និង ឆ្នាំ២០៣២ នៅទីក្រុង Brisbane ដែលអូស្ត្រាលីរៀបចំធ្វើម្ចាស់ផ្ទះ៕