អូឡាំពិកក្រុងប៉េកាំង នឹងដំណើរការពីថ្ងៃទី៤ ខែកុម្ភៈ ដល់ថ្ងៃទី២០ ខែកុម្ភៈ។ ម្ចាស់ផ្ទះចិន នឹងរៀបកីឡាករនេះដោយមានការរឹតត្បិត ដើម្បីទប់ស្កាត់ការរីករាលដាលកូវីដ-១៩ អំឡុងពេលប្រកួត និងនៅក្នុងប្រទេសទាំងមូល។ 
 

«ចំនួនជនបរទេសនឹងកើនឡើង។​ ពួកគេមកពីប្រទេសផ្សេងៗជុំវិញពិភពលោកទៅកាន់ប្រទេសចិន។ ជាលទ្ធផល ករណីវិជ្ជមានកូវីដ-១៩ ក៏កើនឡើងក្នុងកម្រិតខ្ពស់ផងដែរ»។ នេះជាការអះអាងរបស់លោក Han Zirong អនុប្រធាន និងជាអគ្គលេខាធិការនៃគណៈកម្មាធិការរៀបចំអូឡាំពិកក្រុងប៉េកាំង ក្នុងសន្និសីទសារព័ត៌មានមួយ។ នេះបើតាមការផ្សាយរបស់ទីភ្នាក់ងារព័ត៌មាន Reuters។
 

ចាប់តាំងពីចិនមានវត្តមានកូវីដ-១៩ជាថ្មី និងមានករណីអូមីក្រុងលើអ្នកដំណើរពីក្រៅប្រទេសចំនួន៥ករណី ប្រទេសនេះបានបិទព្រំដែនរបស់ខ្លួន នឹងមិនអនុញ្ញាតឱ្យអ្នកគាំទ្រក្រៅប្រទេសចូលទស្សនាការប្រកួតក្នុងកីឡដ្ឋានផ្ទាល់ឡើយ។
 

ស្របពេលគ្នានេះ ម្ចាស់ផ្ទះចិនបានជំរុញឱ្យអត្តពលិកទាំងអស់ដែលចូលរួមអូឡាំពិក និងអ្នកគាំទ្រដែលធ្វើដំណើរចូលទឹកដីចិនទទួលវ៉ាក់សាំងបង្កាជំងឺកូវីដ-១៩ ដើម្បីទប់ស្កាត់ជំងឺឆ្លងទាំងអស់គ្នា៕