កីឡាអន្តរជាតិ
អន្តរជាតិ
ឥណ្ឌាសង់រូបសំណាក Ronaldo ដើម្បីបំផុសគំនិតយុវជន តែរងការរិះគន់
× ឥណ្ឌាបានសង់រូបសំណាករបស់ Cristiano Ronaldo ក្នុងរដ្ឋ Goa និងបានដាក់សម្ពោធជាផ្លូវការនៅថ្ងៃទី២៩ ខែធ្នូ។ រូបសំណាកដែលគាំទ្រការសាងសង់ដោយអ្នកជំនួញ និងនយោបាយឥណ្ឌាលោក Michael Lobo មានគោលបំណងបំផុសគំនិតយុវជន ប៉ុន្តែក៏រងការរិះគន់ពីសំណាក់សមាជិកអ្នកកីឡាបាល់ទាត់ឥណ្ឌាផងដែរ។
លោក Michael Lobo រដ្ឋមន្ត្រីក្នុងជួររដ្ឋាភិបាលឥណ្ឌា និងជាអ្នកមានឥទ្ធិពលម្នាក់ក្នុងរដ្ឋ Goa នៅថ្ងៃទី២៩ ខែធ្នូបានបង្ហោះលើ Twitter ថា រូបសំណាក Ronaldo សង់ឡើងដើម្បីលើកកម្ពស់កីឡាបាល់ទាត់ឥណ្ឌា តាមរយៈការបំផុសគំនិតយុវជនឱ្យលេងកីឡានេះ និងដើម្បីគេចផុតពីអំពើអបាយមុខផ្សេងៗផង។
«នៅពេលមនុស្សនិយាយពីបាល់ទាត់ ពួកគេក៏និយាយពី Ronaldo ដែរ។ ដូច្នេះយើងបានដំឡើងរូបសំណាកនៅទីនេះ ដើម្បីឱ្យក្មេងប្រុសស្រីនៅវ័យក្មេងទទួលបានការបំផុសគំនិតស្រឡាញ់កីឡានេះ ដូច្នេះវិស័យកីឡានេះនឹងកើនឡើង»។ នេះបើតាមការអះអាងរបស់លោក Lobo។
យ៉ាងណាក៏ដោយរូបសំណាកថ្មីរបស់ខ្សែប្រយុទ្ធក្រុម Manchester United នៅលើទឹកដីឥណ្ឌជាលើកដំបូងនេះ បានបង្កឱ្យមានភាពចម្រូងចម្រាសនៅក្នុងរដ្ឋ Goa។ អ្នកនៅក្នុងតំបន់នេះ រួមជាមួយអ្នកកីឡាបាល់ទាត់មួយចំនួនបានជំទាស់នឹងវត្តមានរូបសំណាក់នេះ ដោយពួកគេលើកឡើងថា ហេតុអ្វីសង់រូបកីឡាករប្រទេសដទៃ មិនផ្តល់កិត្តិយសឱ្យកីឡាករឥណ្ឌាខ្លួនឯង។
ក្រុមអ្នករិះគន់លើកឡើងថា កីឡាករបាល់ទាត់ក្នុងស្រុកគួរតែទទួលបានការផ្តល់កិត្តិយស ជាពិសេសកីឡាករចាស់ ថ្មីជាសមាជិកក្រុមជម្រើសជាតិឥណ្ឌាដែលមានកំណើតនៅ Goan។
បើតាមការផ្សាយរបស់កាសែត Times of India អំឡុងពេលសម្ពោធរូបសំណាករបស់ Ronaldo មានមនុស្សមួយចំនួនបានគ្រវីទង់ខ្មៅ ដើម្បីបង្ហាញការតវ៉ាទៀតផង៕
© រក្សាសិទ្ធិដោយ thmeythmey.com