«ជាអកុសល ថ្ងៃនេះ ខ្ញុំត្រូវបានមនុស្សកំសាកបួននាក់ [ចោរប្លន់] ធ្វើបាបខ្ញុំ និងព្យាយាមធ្វើបាបគ្រួសារខ្ញុំ។ ពួកគេបានយកគ្រឿងអលង្ការរបស់ខ្ញុំទាំងអស់ ហើយបន្សល់ទុកឱ្យខ្ញុំនូវស្នាមរបួសលើមុខទៀត»។ Cancelo បានបង្ហោះលើបណ្តាញសង្គម Instagram ផ្ទាល់របស់គេដូច្នេះ។
 

Cancelo មិនបានប្រាប់ពីកន្លែងដែលឧបទ្ទវហេតុនេះបានកើតឡើងនោះទេ ប៉ុន្តែក្លិប Man City និយាយថាអំពើប្លន់នេះបានកើតឡើងនៅផ្ទះរបស់កីឡាករខ្លួន។ 
 

Cancelo ខ្សែការពារសញ្ជាតិព័រទុយហ្កាល់បានផ្លាស់ពី Juventus ទៅចូលរួមជាមួយ Man City ក្នុងតម្លៃ៦០លានផោន កាលពីឆ្នាំ២០១៩។ អតីតកីឡាករ Inter Milan និង Valencia វ័យ២៨ឆ្នាំរូបនេះបានបង្ហាញទម្រង់លេងយ៉ាងល្អដើម្បីជួយក្រុម Man City ឈ្នះជើងឯក Premier League រដូវកាលមុន និងកំពុងជួយក្រុមមេឃខៀវនាំមុខដាច់កំពូលតារាងនៅរដូវកាល២០២១-២២នេះផង។ 
 

Cancelo បន្តក្នុងសំណេរលើ Instagram ទៀតថារូបគេធ្លាប់ជួបឧបសគ្គជាច្រើនក្នុងជីវិត ហើយនេះគ្រាន់តែជារឿងតូចតាចមួយប៉ុណ្ណោះ។ កាលពីនៅអាយុ១៨ឆ្នាំ ខ្សែការពារស្តាំរូបនេះ រៀបរាប់ថាបានជួបគ្រោះថ្នាក់ចរាចរណ៍ដែលបានសម្លាប់ម្តាយខ្លួនទៀតផង។
 

ក្លិប Man City ភ្ញាក់ផ្អើលយ៉ាងខ្លាំងក្រោយទទួលបានដំណឹងជុំវិញការប្លន់កីឡាករខ្លួន និងអ្វីដែល Cancelo បានបង្ហោះនោះ។ ក្លិបអង់គ្លេសនេះ​ ទទួលរ៉ាប់រងលើ Cancelo និងក្រុមគ្រួសាររបស់គេ ហើយកំពុងទំនាក់ទំនងជាមួយប៉ូលិសដើម្បីស៊ើបអង្កេតតាមចាប់ជនដៃដល់ទាំងនោះ៕