អន្តរជាតិ
អ្នកវិទ្យាសាស្ត្រនូវែលសេឡង់ កំពុងបង្កើតសាំងយន្តហោះពីពន្លឺព្រះអាទិត្យ និងខ្យល់
× អ្នកវិទ្យាសាស្ត្រ បានបង្កើតគំនិតផលិតសាំងយន្តហោះដោយប្រើពន្លឺព្រះអាទិត្យ និងខ្យល់។ ដំណើរការផលិតនេះ អាចជួយលើកកម្ពស់គោលដៅអភិវឌ្ឍប្រកបដោយនិរន្តរភាព ព្រោះចំហេះសាំងប្រភេទថ្មីនេះ ផលិតចេញពីប្រភពថាមពលដែលមាននិរន្តរភាព ហើយវាបំភាយឧស្ម័នកាបូនិចស្មើចំនួនដែលយកមកផលិតប៉ុណ្ណោះ។ ដូច្នេះ វាមិនបន្ថែមបរិមាណឧស្ម័នកាបូនិចទៅក្នុងបរិយាកាស ដូចចំហេះសាំងដែលធ្លាប់ប្រើកន្លងមកឡើយ។
អ្នកវិទ្យាសាស្ត្រនូវែលសេឡង់កំពុងដំណើរការផលិតសាំងយន្តហោះដែលមានអព្យាក្រឹតកាបូនដោយប្រើពន្លឺព្រះអាទិត្យ និងខ្យល់។ ចំហេះប្រេងសាំងប្រភេទថ្មីនេះ ត្រូវបានផលិតចេញពីប្រភពថាមពលមាននិរន្តរភាពគឺពន្លឺព្រះអាទិត្យនិងខ្យល់ ដែលផ្ទុកកាបូន ហើយនៅពេលយន្តហោះដំណើរការ វាបំភាយកាបូនិចស្មើបរិមាណដែលយកមកផលិតប៉ុណ្ណោះ។ ដូច្នេះ សាំងដែលមាននិរន្តរភាពមិនបន្ថែមកាបូនិចទៅក្នុងបរិយាកាសដូចសាំងដែលធ្លាប់ប្រើឡើយ។
ថាមពលពន្លឺព្រះអាទិត្យ ត្រូវបានប្រើប្រាស់សម្រាប់បំបែកកាបូនិច និងទឹកចេញពីខ្យល់ដើម្បីបង្កើតជាល្បាយឧស្ម័នដែលមានវត្តមានអ៊ីដ្រូសែន និងកាបូនអុកស៊ីត។ នេះគឺជាសារធាតុផ្សំបង្កើតប្រេងកាតនិងមេតាណុលសម្រាប់ជំនួសសាំងដែលតែងប្រើកន្លងមក។
ដំណើរការផលិតសាំងដែលមាននិរន្តរភាពនេះ គឺជាការខិតខំដើម្បីដោះស្រាយវិបត្តិបម្រែបម្រួលអាកាសធាតុ ដោយការទប់ស្កាត់ការបំភាយកាបូនចេញពីវិស័យគមនាគមន៍។ នេះដោយសារ ឧស្សាហកម្មយន្តហោះ បានចូលរួមបំភាយកាបូនប្រមាណ ៣ភាគរយដែរនៃការបំភាយសរុបដោយសកម្មភាពមនុស្ស។
បើតាមសមាគមគមនាគមន៍អាកាសអន្តរជាតិ (IATA) ការប្រើសាំងយន្តហោះប្រកបដោយនិរន្តរភាពនឹងត្រូវដើរតួនាទីយ៉ាងសំខាន់ក្នុងការសម្រេចគោលដៅកាបូនសូន្យនៅឆ្នាំ ២០៥០។
រហូតមកដល់ពេលនេះ ក្រុមហ៊ុនអាកាសចរជាង ៦០ បានចូលរួមក្នុងគោលដៅប្រើប្រាស់សាំងដែលមាននិរន្តរភាពឱ្យបាន១០ភាគរយ ត្រឹមឆ្នាំ២០៣០ ព្រោះនេះគឺជាផ្នែកមួយនៃកិច្ចខិតខំប្រឹងប្រែងដើម្បីឈានដល់ការបំភាយឧស្ម័នសូន្យ នៅឆ្នាំ២០៥០៕
© រក្សាសិទ្ធិដោយ thmeythmey.com