សរសេរលើបណ្តាញសង្គម Twitter រដ្ឋមន្រ្តីការពារជាតិអាម៉េរិក លោក ឡយ អូស្ទីន បានបញ្ជាក់យ៉ាងច្បាស់ថា លោក មានលទ្ធផលវិជ្ជមាននៃជំងឺកូវីដ-១៩ នៅព្រឹកថ្ងៃទី២ ខែមករា។ លោក អូស្ទីន បានធ្វើតេស្តជំងឺកូវីដ-១៩ បន្ទាប់ពីចេញរោគសញ្ញា ក្នុងអំឡុងពេលសម្រាកនៅផ្ទះ។ សុខភាពរបស់លោករដ្ឋមន្រ្តី កំពុងស្ថិតក្នុងសភាពធូរស្រាល។ លោក អូស្ទីន ទទួលបានវ៉ាក់សាំងចំនួន ៣ដូសរួចហើយក៏ដោយ។ 

 

«ដោយគ្រូពេទ្យបានប្រាប់ខ្ញុំយ៉ាងច្បាស់ថា ការទទួលបានវ៉ាក់សាំងពេញលេញ រួមទាំងដូសជំរុញនៅដើមខែតុលា បានធ្វើឱ្យស្ថានភាពជំងឺមានភាពធូរស្រាល»។ ប្រមុខការពារជាតិអាម៉េរិក បានសង្កត់ធ្ងន់បែបនេះ។ 

 

ទន្ទឹមនេះ លោកអូស្ទីន ក៏បានអំពាវនាវឱ្យប្រជាជនដែលអាចចាក់វ៉ាក់សាំងដូសជំរុញ ទៅទទួលវ៉ាក់សាំងផងដែរ ដើម្បីទប់ស្កាត់ជំងឺកូវីដ-១៩។ លោក អូស្ទីន នឹងស្នាក់នៅផ្ទះព្យាបាលជំងឺរយៈពេល ៥ថ្ងៃ និងចូលរួម ក្នុងកិច្ចប្រជុំសំខាន់តាមប្រព័ន្ធវីដេអូ និងបន្តទទួលបន្ទុកកិច្ចការទាំងអស់។ 

 

សូមបញ្ជាក់ថា មកទល់ពេលនេះ អាម៉េរិក បានផ្តល់វ៉ាក់សាំងបង្ការជំងឺកូវីដ-១៩ ប្រមាណ ៥០៨លានដូស ដល់ប្រជាជនខ្លួន ដោយប្រជាជនចំនួន ២០៤លាននាក់ បានទទួលវ៉ាក់សាំងពេញលេញ។ អាម៉េរិក នៅតែបន្តជាប្រទេស ដែលមានករណីឆ្លងជំងឺកូវីដ-១៩ ច្រើនជាងគេបំផុតលើពិភពលោក ពោលគឺមានករណីឆ្លងសរុបជាង ៥៦លានករណី និងអ្នកស្លាប់ចំនួន ៨៤ម៉ឺននាក់៕