ហុងកុងដែលធ្លាប់ស្ថិតនៅក្រោមអាណានិគមអង់គ្លេសត្រូវបានប្រគល់ឱ្យចិនកាន់កាប់វិញនៅឆ្នាំ១៩៩៧ ទទួលបានការសន្យាថា សេរីភាពសិទ្ធិបុគ្គលរួមមានសេរីភាពសារព័ត៌មាននឹងត្រូវបានការការពារក្នុងរយៈពេល៥០ឆ្នាំ។ ប៉ុន្តែសកម្មជនគាំទ្រលទ្ធិប្រជាធិបតេយ្យ និងក្រុមសិទ្ធិមនុស្សលើកឡើងថា សេរីភាពត្រូវបានបំបិទបន្តិចម្តងៗ ជាពិសេសចាប់តាំងពីទីក្រុងប៉េកាំងបានដាក់ច្បាប់សន្តិសុខជាតិទៅលើទីក្រុងហុងកុងនៅឆ្នាំ ២០២០។

 

ប្រព័ន្ធផ្សព្វផ្សាយដែលមាននិន្នាការគាំទ្រប្រជាធិបតេយយ ត្រូវមើលឃើញថា​ ជាគោលដៅរបស់រដ្ឋាភិបាលហុងកុង ដោយអង្គភាពចំនួនពីរហើយរងការចំណាត់ការពីរដ្ឋាភិបាលទីក្រុង។​ នៅថ្ងៃទី២ ខែមករា សារព័ត៌មានអនឡាញ Citizen News ក៏ប្រកាសផ្អាកដំណើរការរបស់ខ្លួនដើម្បីសុវត្ថិភាព។

 

«គួរឱ្យសោកស្តាយចំពោះការផ្លាស់ប្តូរយ៉ាងឆាប់រហ័សនៅក្នុងសង្គម និងបរិយាកាសដ៏អាប់អួរនៃប្រព័ន្ធផ្សព្វផ្សាយដែល​ធ្វើឱ្យយើងមិនអាចសម្រេចគោលដៅរបស់យើងដោយគ្មានការភ័យខ្លាចបាន។ ចំពេលវិបត្តិនេះ យើងត្រូវធ្វើឱ្យប្រាកដថា មនុស្សរាល់គ្នាដែលជិះទូកជាមួយនេះមានសុវត្ថិភាព»។ Citizen News ប្រកាសនៅក្នុងសេចក្តីថ្លែងការណ៍មួយនៅថ្ងៃទី២ ខែមករា។

 

សារព័ត៌មាន Citizen News ដែលត្រូវបានបង្កើតឡើងនៅឆ្នាំ២០១៧ បញ្ជាក់នៅលើ Facebook ថា ខ្លួនមិនមានទំនាក់ទំនងជាមួយភាគីណាទេ ហើយគោលបំណងរបស់ប្រព័ន្ធផ្សព្វផ្សាយខ្លួននេះធ្វើឡើងដើម្បីលើកកម្ពស់តម្លៃស្នូលរបស់ហុងកុង ដូចជាសេរីភាព ភាពបើកចំហ ភាពចម្រុះ និងការទទួលបានព័ត៌មានស្មើៗគ្នា។

 

ការប្រកាសបិទប្រតិបត្តិការសារព័ត៌មានឯករាជ្យរបស់ហុងកុង Citizen News នេះកើតឡើង ប៉ុន្មានថ្ងៃបន្ទាប់ពីប៉ូលិសហុងកុងឆ្មក់ចូលការិយាល័យសារព័ត៌មានអនឡាញរបស់ហុងកុង Stand News ។ ប៉ុន្មានម៉ោងក្រោយមក Stand News ក៏ប្រកាសបិទប្រតិបត្តិការរបស់ខ្លួន។ កម្លាំងប៉ូលិសហុងកុងបានចាប់ខ្លួនបុគ្គលិកពាក់ព័ន្ធមួយចំនួនរួមមាននិពន្ធនាយកស្តីទី និងអតីតនិពន្ធនាយកជាដើមដែលត្រូវបានចោទប្រកាន់ពីបទសមគំនិតក្នុងការចេញអត្ថបទផ្សាយធ្វើឱ្យមានការបះបោរ៕