អន្តរជាតិ
វៀតណាម ជំរុញឱ្យចិនបើកព្រំដែនឡើងវិញជាបន្ទាន់ ខណៈការនាំចេញចូលទំនិញកំពុងរាំងស្ទះ ឡានដឹកទំនិញឈប់សំចតនៅព្រំដែនចិន-វៀតណាម។ រូបថត Xinhua
× ក្រសួងពាណិជ្ជកម្មវៀតណាមបានជំរុញឱ្យអាជ្ញាធរខេត្តគ័ងស៊ីរបស់ចិន បើកច្រកព្រំដែនឡើងវិញជាបន្ទាន់ដើម្បីសម្រួលដឹកជញ្ជូនទំនិញ។ នេះបើតាមការផ្សាយរបស់ទីភ្នាក់ងារព័ត៌មានវៀតណាម (VNA) កាលពីចុងសប្ដាហ៍មុន។ រថយន្តដឹកទំនិញជាច្រើនគ្រឿងបានកកស្ទះនៅព្រំដែនប្រទេសទាំងពីរ ខណៈរដ្ឋាភិបាលចិនបង្កើនការគ្រប់គ្រប់ព្រំដែនដើម្បីទប់ស្កាត់ការរាលដាលជំងឺកូវីដ-១៩។
រូបភាព និងវីដេអូពីទីភ្នាក់ងារព័ត៌មានវៀតណាម បានបង្ហាញពីឡានដឹកទំនិញរាប់ពាន់គ្រឿងត្រូវបានចតនៅតាមព្រំដែនវៀតណាម-ចិន បន្ទាប់ពីចិនរកឃើញករណីជំងឺកូវីដ-១៩ នាំចូលនៅក្នុងតំបន់ស្វយ័តគ័ងស៊ី។ វិធានការនេះ ធ្វើឱ្យប៉ះពាល់ដល់សេដ្ឋកិច្ចរបស់វៀតណាមជាខ្លាំងជាពិសេសលើការនាំចេញបន្លែ និងផ្លែឈើទៅកាន់ទីផ្សារចិន។
ខណៈរងផលប៉ះពាល់យ៉ាងធ្ងន់ធ្ងរដោយសារវិធានការរឹតត្បិតរបស់ចិន ក្នុងសេចក្ដីថ្លែងការណ៍មួយ ក្រសួងពាណិជ្ជកម្មវៀតណាមបានរិះគន់ថា វិធានការដ៏តឹងរ៉ឹងរបស់ចិនដើម្បីទប់ស្កាត់ជំងឺកូវីដ-១៩ គឺលើសពីតម្រូវការជាក់ស្ដែង ហើយចិនគួរតែបើកច្រកផ្លូវឡើងវិញ។
«ការរអាក់រអួលនេះ បានបណ្តាលឱ្យមានផលប៉ះពាល់អវិជ្ជមានលើផ្នែកពាណិជ្ជកម្មទ្វេភាគី និងការខាតបង់យ៉ាងខ្លាំងដល់អាជីវកម្ម និងផលប្រយោជន៍ប្រជាជនទាំងសងខាង»។ ទីភ្នាក់ងារព័ត៌មាន VNA ស្រង់សំណេរពីក្រសួងពាណិជ្ជកម្មវៀតណាមបែបនេះ។
ជាការធ្លើយតប មន្ត្រីពាណិជ្ជកម្មតំបន់គ័ងស៊ីបានអះអាងថា ពួកគេនឹងពង្រីករយៈពេលក្នុងការត្រួតពិនិត្យទំនិញនាំចេញនាំចូល និងបញ្ជូនសំណើរបស់វៀតណាមទៅថ្នាក់ទៀត។ នេះបើយោងតាម របាយការណ៍មួយពីភាគីចិនដែលផ្សាយដោយទីភ្នាក់ងារព័ត៌មាន Reuters ។
គួរបញ្ជាក់ថា ចិនជាដៃគូពាណិជ្ជកម្មដ៏ធំបំផុតមួយ ហើយក៏ជាទីផ្សារដ៏ធំបំផុតសម្រាប់ផ្លែឈើ និងបន្លែរបស់វៀតណាមផងដែរ។ ទិន្នន័យផ្លូវការបានបង្ហាញថា ចំណូលពាណិជ្ជកម្មនៃផលិតផលកសិកម្មរវាងប្រទេសទាំងពីរក្នុងរយៈពេល១១ខែក្នុងឆ្នាំ២០២១ កើនឡើង១៩,៥ភាគរយបើធៀបនឹងរយៈពេលដូចគ្នាកាលពីឆ្នាំ២០២០ ដែលមានចំនួនទឹកប្រាក់១១,៣ពាន់លានដុល្លារ៕
© រក្សាសិទ្ធិដោយ thmeythmey.com