ជាតិ
ត្មាតភ្លើង៧ក្បាល បង្ហាញខ្លួនជាថ្មីក្នុងដែនជម្រកសត្វព្រៃស្រែពកក្រោយអវត្តមាន២ឆ្នាំ
× សត្វត្មាត៧ក្បាល បានបង្ហាញវត្តមានជាថ្មី នៅអាហារដ្ឋានត្មាត ក្នុងដែនជម្រកសត្វព្រៃស្រែពក ខេត្តមណ្ឌលគិរី កាលពីថ្ងៃទី២៧ ខែធ្ន ឆ្នាំ២០២១កន្លងទៅ។ លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី បានឱ្យសារព័ត៌មាន ThmeyThmey25 ដឹងថា នេះគឺជាលើកទីមួយហើយ ដែលក្រុមអ្នកវិទ្យាសាស្រ្តផ្នែកស្រាវជ្រាវសត្វព្រៃនៃមន្ទីរបរិស្ថានខេត្ត និងអង្គការដៃគូWWF បានប្រទះឃើញចំនួនសត្វត្មាតភ្លើងដល់ទៅ៧ក្បាល ក្រោយបាត់វត្តមានពីអាហារដ្ឋាន នៃដែនជម្រកសត្វព្រៃស្រែពក ២ឆ្នាំមកហើយ។
បើតាមប្រធានមន្ទីរបរិស្ថានខេត្តមណ្ឌលគិរី កន្លងមកអ្នកស្រាវជ្រាវធ្លាប់ឃើញ សត្វត្មាតភ្លើងដែលចុះមករកចំណីនៅតំបន់នេះ តែ៥ក្បាល ឬ ៦ក្បាលប៉ុណ្ណោះ។ ជាមួយនឹងវត្តមានរបស់វានាពេលនេះ លោក កែវ សុភគ៌ សង្ឃឹមថា នឹងមានចំនួនសត្វត្មានភ្លើងកើនឡើងជាបន្តទៀត។ «សត្វត្មាតមាន តែចម្រុះគ្នា មិនមែនមានសុទ្ធដូចពេលនេះ។ ចំពោះវត្តមានសត្វត្មាតផ្សេងទៀត ដូចជាត្មាតប្រផេះ ត្នោត ក៏ឃើញមានហើរតែមិនឃើញចុះមកស៊ីចំណី។ លើកនេះរៀងចម្លែកបន្តិច ដោយសារមានត្មាតតែមួយប្រភេទមកស៊ីសពគោ នៅអាហារដ្ឋានយើង»។ លោក កែវ សុភគ៌ បញ្ជាក់ដូច្នេះ។
សត្វត្មាត៣ប្រភេទ ដែលធ្លាប់មានវត្តមានក្នុងដែនជម្រកសត្វព្រៃស្រែពក មានត្មាតប្រផេះ ត្មាតត្នោត និងត្មាតភ្លើង។ បើតាមលោក កែវ សុភគ៌ ចំនួនសត្វត្មាតនៅដែនជម្រកសត្វព្រៃស្រែពក បានធ្លាក់ចុះគួរឱ្យកត់សម្គាល់។ មូលហេតុនៃការធ្លាក់ចុះ ត្រូវបានប្រធានមន្ទីរបរិស្ថានខេត្តមណ្ឌលគិរី អះអាងថាបណ្ដាលមកពីការពុលចំណី។ ក្នុងបំណងអភិរក្សចំនួនសត្វត្មាតនៅក្នុងតំបន់ លោក កែវ សុភគ៌ ក៏បញ្ជាក់ដែរថា អាជ្ញាធរតែងតែចុះអប់រំ ណែនាំពលរដ្ឋ កុំឱ្យប្រើប្រាស់ថ្នាំលើសពសត្វពាហនៈ ដែលអាចបង្កឱ្យប៉ះពាល់ដល់សត្វត្មាត ដេលស៊ីសពសត្វទាំងនោះ៕
Tag:
ត្មាតភ្លើង
ដែនជម្រកសត្វព្រៃស្រែពក
© រក្សាសិទ្ធិដោយ thmeythmey.com