កីឡាករវាយកូនបាល់លំដាប់ទី១ពិភពលោក Djokovic នៅរថ្ងៃទី១៦ ខែមករាធ្វើដំណើរចេញពីប្រទេសអូស្ត្រាលី ក្រោយត្រូវបានប្រទេសនេះដកហូតទិដ្ឋកាជាលើកទីពីរ ហើយត្រូវខកខានប្រកួត Australian Open ក្នុងនាមជាម្ចាស់ការពារជើងឯក។ 
 

កីឡាករសញ្ជាតិស៊ែប៊ី វ័យ៣៤ឆ្នាំ ចាញ់ក្តីនៅតុលាការអូស្ត្រាលី ដោយសាររូបគេមិនបានចាក់វ៉ាក់សាំងការពារកូវីដ-១៩។ ព្រឹត្តិការណ៍ Australian Open ឆ្នាំ២០២២ ដំណើរការដោយមានការរឹតបន្តឹងពីសំណាក់អាជ្ញាធរក្រុងមែលដោយសារតែវីរុសបំប្លែងថ្មីអូមីក្រុងកើនឡើងខ្លាំង។ សូម្បីអ្នកទស្សនាក៏ត្រូវបន្ថយ៥០ភាគរយដែរ។
 

ដោយឡែកនៅព្រឹត្តិការណ៍ French Open ដែលនឹងធ្វើឡើងបន្ទាប់ពី Australian Open នឹងមិនអនុញ្ញាតឱ្យ Djokovic ចូលរួមដូចគ្នា ប្រសិនបើម្ចាស់ Grand Slam ២០សម័យរូបនេះនៅតែមិនទទួលការចាក់វ៉ាក់សាំងកូវីដ-១៩។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
 

ក្រសួងកីឡាបារាំងអះអាងថា សម្រាប់ Djokovic បើគ្មានវ៉ាក់សាំងទេ រូបគេក៏មិនអាចមានវត្តមាននៅ French Open ដែរ។ «ប័ណ្ណចាក់វ៉ាក់សាំងនឹងត្រូវបានដាក់ឱ្យប្រើប្រាស់ទាំងប្រជាជនបុគ្គលល្បីៗនៅពេលពួកគេទៅកន្លែងសាធារណៈ ដូចជាភោជនីយដ្ឋាន ហាងកាហ្វេ រោងកុន និងកីឡដ្ឋានជាដើម»។ នេះជាការបញ្ជាក់របស់ក្រសួង ខណៈច្បាប់ថ្មីនេះបានអនុម័តរួចហើយនៅថ្ងៃទី១៦ ខែមករា ឆ្នាំ២០២២៕