ក្នុងកិច្ចសម្ភាសជាមួយសារព័ត៌មាន Nikkei Asia ដែលចេញផ្សាយនៅថ្ងៃទី២៦ ខែមករា អ្នកនាំពាក្យរដ្ឋាភិបាលយោធាមីយ៉ាន់ម៉ា លោក Zaw Min Tun បានលើកឡើងថា យោធាមីយ៉ាន់ម៉ា មិនមានគម្រោងរំលាយបក្សសម្ព័ន្ធជាតិដើម្បីប្រជាធិបតេយ្យ របស់លោកស្រី អ៊ុងសាន ស៊ូជី ដល់ខែសីហា ឆ្នាំ ២០២៣ ឡើយ។ 

 

«ការសម្រេចចិត្ត គឺផ្អែកលើគណៈកម្មការរៀបចំការបោះឆ្នោត»។ លោក Zaw Min Tun បានបន្ថែមបែបនេះ។ អ្នកនាំពាក្យរដ្ឋាភិបាលយោធាមីយ៉ាន់ម៉ា បញ្ជាក់ថា ការសម្រេចចិត្តចូលរួមក្នុងការបោះឆ្នោតខាងមុខ គឺអាស្រ័យលើការកំណត់របស់បក្សសម្ព័ន្ធជាតិដើម្បីប្រជាធិបតេយ្យផ្ទាល់។ 

 

កន្លងមក មេដឹកនាំយោធា លោកមីន អ៊ុងឡាំង បានប្រកាសថា ការបោះឆ្នោតថ្នាក់ជាតិនៅមីយ៉ាន់ម៉ា នឹងធ្វើឡើងនៅក្នុងខែសីហា ឆ្នាំ ២០២៣។ 

 

បើតាមមន្រ្តីយោធាមីយ៉ាន់ម៉ារូបនេះ របបសឹក បានចាត់ទុកសមាជិកសភាជាប់ឆ្នោតរបស់បក្សសម្ព័ន្ធជាតិ ដើម្បីប្រជាធិបតេយ្យជាពីរប្រភេទ ពោលគឺបុគ្គលប្រកាន់កណ្តាល និងជ្រុយនិយម។ តាមសារព័ត៌មាន Nikkei Asia រដ្ឋាភិបាលយោធា គ្រោងអនុញ្ញាតឱ្យសមាជិកសភាប្រកាន់ផ្លូវកណ្តាលជួបជាមួយតំណាងអាស៊ាន។ 

 

បន្ទាប់ពីរដ្ឋប្រហារយោធានៅមីយ៉ាន់ម៉ា សមាជិកសភាជាប់ឆ្នោតរបស់បក្សសម្ព័ន្ធជាតិដើម្បីប្រជាធិបតេយ្យជាច្រើនរូបត្រូវបានចាប់ខ្លួន ខណៈអ្នកផ្សេងទៀតនៅតែបន្តគេចខ្លួន។ លោកស្រី អ៊ុងសាន ស៊ូជី និងអ្នកនយោបាយជាន់ខ្ពស់របស់បក្ស NLD ផ្សេងទៀត បានរងបទចោទ និងកាត់ទោសឱ្យជាប់ពន្ធនាគារជាបន្តបន្ទាប់។ ទន្ទឹមនេះ សមាជិកបក្ស NLD​ មួយរូប ត្រូវបានតុលាការគ្រប់គ្រងដោយយោធា កាត់ទោសប្រហារជីវិត ក្រោមច្បាប់ប្រឆាំងភេរវកម្ម។ 

 

បើទោះបក្ស NLD មិនត្រូវបានរំលាយរហូតដល់ថ្ងៃរៀបចំការបោះឆ្នោតនៅខែសីហា ឆ្នាំ២០២៣ ក៏ដោយ ក៏បក្សមួយនេះពិបាក​ ក្នុងការចូលរួមក្នុងការបោះឆ្នោតដែរ ដោយសារសមាជិកបក្សជាច្រើនរូប ត្រូវបានឃុំខ្លួន និងគេចខ្លួន។ តាមទិន្នន័យពីបក្សសម្ព័ន្ធជាតិ ដើម្បីប្រជាធិបតេយ្យ សមាជិកបក្សចំនួន ៤៨៩ នៅតែបន្តជាប់ឃុំ ខណៈលោកស្រីស៊ូជី ស្ថិតក្រោមបទចោទរបស់តុលាការ៕