កូរ៉េខាងជើង បានបាញ់មីស៊ីលចំនួនពីរលើក នៅថ្ងៃទី២៥ និងថ្ងៃទី២៧ ខែមករា ដើម្បីពង្រឹងសមត្ថភាពយោធារបស់ខ្លួន។ តាមការចុះផ្សាយរបស់ទីភ្នាក់ងារព័ត៌មាន KCNA នៅថ្ងៃទី២៨ ខែមករា មីស៊ីល ដែលក្រុងព្យុងយ៉ាង បានបាញ់សាកល្បងទាំងពីរលើក គឺជាមីស៊ីលប្រដេញមានចម្ងាយឆ្ងាយ និងមីស៊ីលវាយប្រហារលើដី និងសមុទ្រ។ 

 

«បណ្ឌិត្យសភាវិទ្យាសាស្រ្តការពារជាតិកូរ៉េខាងជើង បានដឹកនាំការបាញ់សាកល្បងប្រព័ន្ធមីស៊ីលប្រដេញចម្ងាយឆ្ងាយ និងកម្លាំងរបស់ក្បាលគ្រាប់សម្រាប់មីស៊ីលវាយប្រហារលើដី»។ ទីភ្នាក់ងារព័ត៌មាន KCNA បានបញ្ជាក់បែបនេះ។ ១

 

យ៉ាងណាមិញ ការសាកល្បងមីស៊ីលលើកចុងក្រោយនោះ មិនមានវត្តមានចូលរួមរបស់លោក គីម ជុងអ៊ុន មេដឹកនាំកូរ៉េខាងជើងឡើយ។ ផ្ទុយទៅវិញ លោក គីម មានវត្តមាននៅរោងចក្រផលិតសម្ភារយោធា ដែលជាកន្លែងផលិតអាវុធដ៏សំខាន់ ជាមួយនឹងប្អូនស្រីរបស់ខ្លួន លោកស្រី Kim Yo-jong និងមន្រ្តីជាន់ខ្ពស់បក្សពលករ លោក Jo Yong-won។ 

 

ជាលើកដំបូង ទីភ្នាក់ងារព័ត៌មានរដ្ឋ បានចុះផ្សាយពីទស្សនកិច្ចរបស់លោកគីម ទៅនៅរោងចក្រផលិតសម្ភារយោធា បើគិតចាប់តាំងពីឆ្នាំ២០១៩ មក បន្ទាប់ពីជំនួបជាមួយលោកដូណាល់ ត្រាំ លើការរំសាយកម្មវិធីនុយក្លេអ៊ែរទទួលបរាជ័យ។ កន្លងមក មេដឹកនាំកូរ៉េខាងជើង បានជំរុញឱ្យពង្រីកកម្លាំងយោធាបន្ថែមទៀត។ 

 

សូមបញ្ជាក់ថា មីស៊ីលប្រដេញ ដែលកូរ៉េខាងជើង បាញ់សាកល្បងនៅថ្ងៃទី២៥ ខែមករា ហោះបាន ៩១៣៧វិនាទី និងវាយប្រហារដែនកោះ ចម្ងាយ ១៨០០គីឡូម៉ែត្រ៕