ភ្នំពេញ៖ យុវជនមួយក្រុម បានរួមគ្នាបង្កើតក្លិបសរសេរកូដមួយ ដែលមានឈ្មោះថា Code for Girls សម្រាប់បង្រៀនដល់យុវតី ឱ្យចេះសរសេរកូដ បង្កើតកម្មវិធីនានា នៅក្នុងវិស័យព័ត៌មានវិទ្យា ដោយឥតគិតថ្លៃ។ បើតាមកញ្ញា រិទ្ធ សុដាលីន ដែលជាស្ថាបនិកក្លិបស្វ័យសិក្សា Code for Girls ក្លិបសរសេរកូដនេះ នឹងចូលរួមលើកកម្ពស់សមភាពយេនឌ័រ ក្នុងវិស័យឌីជីថលនៅកម្ពុជា ឲ្យកាន់តែប្រសើរ។

Code for Girls ជាក្លិបសរសេរកូដមួយ ដែលបង្កើតឡើងសម្រាប់បង្រៀនដល់សិស្សស្រី ឬយុវតី ឱ្យចូលរួមក្នុងការសរសេកូដបង្កើតហ្គេម និងវីដេអូខ្លីមានចលនាផ្សេងៗពីគ្នា។ នេះជាការលើកឡើងរបស់យុវតី រិទ្ធ សុដាលីន។ យុវតីវ័យ១៨ឆ្នាំរូបនេះ បានបញ្ជាក់ថា៖«Code for Girls ហ្នឹង គឺជាក្លិបសិក្សាមួយ សម្រាប់សិស្សស្រីឱ្យគាត់ ចូលរួមក្នុងការសរសេកូដ ពីថ្នាក់មូលដ្ឋានគ្រឹះទៅ ហើយក្លិបសិក្សានេះ បង្កើតឡើងនៅខែវិច្ឆិកា ឆ្នាំ២០២១ ដោយមានសមាជិកចូលរួម៨នាក់»។ 
 

ដើម្បីជ្រាបច្បាស់សូមអញ្ជើញលោក-អ្នកទស្សនាវីដេអូខាងក្រោមដូចតទៅ៖ 

 

 

គោលដៅនៃការបង្កើតក្លិប Code for Girls នេះ គឺដើម្បីលើកទឹកចិត្តដល់យុវតី និងសិស្សស្រីនៅកម្ពុជា ឱ្យហ៊ានចូលប្រឡូកក្នុងវិស័យព័ត៌មានវិទ្យា ជាពិសេស គឺលើកកម្ពស់ និងបណ្ដុះស្មារតីយុវតី ឱ្យចូលរួមក្នុងការសរសេរកូដ និងរួមចំណែកលុបបំបាត់ផ្នត់គំនិតអវិជ្ជមាន ទៅលើស្រ្តីនៅក្នុងវិស័យនេះ។ យុវតី សុដាលីន និយាយដូច្នេះថា៖«ចំពោះចក្ខុវិស័យរបស់ Code for Girls យើងមានពីរសំខាន់ៗ។ ទីមួយ គឺទាក់ទងទៅការបណ្ដុះស្មារតី ក៏ដូចជាការលើកទឹកចិត្តឱ្យសិស្សស្រី ​ចូលរួមក្នុងការសរសេរកូដតាំងពីគាត់នៅថ្នាក់វិទ្យាល័យ។ ទីពីរ យើងចង់ចូលរួមជាផ្នែកមួយ ក្នុងការលុបបំបាត់ផ្នត់គំនិតអវិជ្ជមានទៅលើស្ត្រី…ហើយជួយឱ្យគាត់ដើរចេញពីភាពស្រណុកសុខស្រួល ហ៊ានចាប់យកអ្វីដែលគាត់ស្រឡាញ់ ហើយដើរតាមក្ដីស្រមៃរបស់គាត់»។