ជាតិ
ក្រសួងអប់រំរៀបចំការប្រកួតអំណាន និងតែងនិពន្ធ សម្រាប់សិស្សកម្រិតបឋម និងមធ្យមសិក្សា
× ភ្នំពេញ៖ ក្រសួងអប់រំ យុវជន និងកីឡា រៀបចំការប្រកួត តែងនិពន្ធ ស្មូតកំណាព្យ និងអានអត្ថបទ សម្រាប់សិស្សកម្រិតបឋមសិក្សា ដល់មធ្យមសិក្សាទុតិយភូមិ ក្រោមប្រធានបទ « អំណានជួយលើកកម្ពស់គុណភាពជីវិតក្នុងសង្គមឌីជីថល » នៅថ្ងៃទី១១ ខែមីនា ឆ្នាំ២០២២។ នេះបើតាមសេចក្ដីជូនដំណឹងរបស់ក្រសួងអប់រំ យុវជន និងកីឡា។
បើតាមក្រសួងអប់រំ បេក្ខជនជ័យលាភី នឹងទទួលបានពានរង្វាន់ជ័យលាភីថ្នាក់ជាតិ ពីលេខ១ ដល់លេខ៣ និងពានរង្វាន់សមេ្ដច ហ៊ុន សែន ពីក្រសួងអប់រំផងដែរ។
ការប្រកួតអំណាននេះមាន ៣វិញ្ញាសាផ្សេងគ្នាតាមកម្រិតសិស្សចាប់ពីថ្នាក់ទី៤ ដល់ថ្នាក់ទី ១២។
សម្រាប់សិស្សបឋមសិក្សា ចាប់ពីថ្នាក់ទី៤ ដល់ ទី៦ អាចចូលរួម លើវិញ្ញាសាអានអត្ថបទ។ ចំណែកសិស្សមធ្យមសិក្សាបឋមភូមិ អាចចូលរួមលើវិញ្ញាសា ស្មូតកំណាព្យ។ ជាមួយគ្នានេះ សិស្សមធ្យមសិក្សាទុតិយភូមិ អាចចូលរួមប្រឡងលើវិញ្ញាសាតែងនិពន្ធ អត្ថបទពាក្យកាព្យ ឬពាក្យរាយ។
សិស្សានុសិស្សអាចដាក់ពាក្យចូលរួមប្រកួតនៅតាមសាលារៀន ឬមន្ទីរអប់រំ យុវជន និងកីឡា សម្រាប់ការប្រឡងថ្នាក់ក្រោមជាតិ ឱ្យបានមុនថ្ងៃទី ២២ខែកុម្ភៈ។ ចំណែកការប្រឡងថ្នាក់ជាតិនឹងធ្វើឡើងនៅថ្ងៃទី ៩ និងថ្ងៃទី១០ ខែមីនា ឆ្នាំ២០២២ នៅអាគាររដ្ឋបាលថ្មីក្រសួងអប់រំ យុវជន និងកីឡា៕
© រក្សាសិទ្ធិដោយ thmeythmey.com