ថ្នាក់ដឹកនាំបណ្តាប្រទេសនៅតំបន់អឺរ៉ុប បានធ្វើទស្សនកិច្ចនៅអ៊ុយក្រែនជាបន្តបន្ទាប់។ នាយករដ្ឋមន្រ្តីអង់គ្លេស បូរីស ចនសុន នៅថ្ងៃទី១ ខែកុម្ភៈ បានធ្វើទស្សនកិច្ចទៅអ៊ុយក្រែន ដើម្បីជជែកពីបញ្ហាដែលកំពុងតែកើតមាននេះ។ ក្នុងសន្និសីទសារព័ត៌មាន ចំពោះមុខប្រធានាធិបតីអ៊ុយក្រែន Volodymyr Zelensky លោក ចនសុន បានព្រមានពីមហន្តរាយ ប្រសិនបើរុស្ស៊ីហ៊ានឈ្លានពានលើអ៊ុយក្រែន។ 

 

«ការឈ្លានពានលើអ៊ុយក្រែន អាចបង្កឱ្យមានមហន្តរាយនយោបាយ, មនុស្សធម៌ និងសម្រាប់រុស្ស៊ីរួមទាំងពិភពលោក»។ ប្រមុខរដ្ឋាភិបាលអង់គ្លេស បានបញ្ជាក់បែបនេះ ដោយបន្ថែមថា ការប្រមូលផ្តុំកម្លាំងយោធានៅតំបន់ក្បែរតំបន់ព្រំដែនអ៊ុយក្រែន អាចជាចំនួនដ៏ច្រើនបំផុតនៅក្នុងឆាកជីវិតមនុស្សជាច្រើន។ 

 

បណ្តាប្រទេសលោកខាងលិច បានអះអាងថា រុស្ស៊ីបានពង្រាយកម្លាំងទ័ពជាង១០ម៉ឺននាក់ និងចង់ឈ្លានពានលើអ៊ុយក្រែន។ យ៉ាងណាមិញ បញ្ហានេះ ត្រូវរុស្ស៊ីទាត់ចោល និងការពារថា ជាការឆ្លើយតបនឹងការគំរាមកំហែងពីប្រទេសលោកខាងលិច និងអ៊ុយក្រែន។ 

 

ពីទីក្រុងកៀវ លោក ចនសុន បានបន្ថែមថា អង់គ្លេស កំពុងរៀបចំទណ្ឌកម្ម និងចំណាត់ការផ្សេងទៀតប្រឆាំងរុស្ស៊ី ប្រសិនបើហ៊ានឈ្លានពានអ៊ុយក្រែន។ បើតាមលោកចនសុន ទណ្ឌកម្មនោះ មិនមែនជាការប្រឆាំងរុស្ស៊ីឡើយ ប៉ុន្តែវាជាការការពារសេរីភាព ប្រជាធិបតេយ្យ និងអធិបតេយ្យរបស់អ៊ុយក្រែន ក្នុងការប្រឈមមុខនឹងការឈ្លានពាន។ 

 

ទន្ទឹមនេះ ប្រមុខរដ្ឋាភិបាលរូបនេះ ក៏បានរំលឹកផងដែរពីជំនួយរបស់ទីក្រុងឡុងដ៍ចំពោះទីក្រុងកៀវ។ ចាប់ពីឆ្នាំ២០១៥ មក អង់គ្លេស បានហ្វឹកហ្វឺនយោធាអ៊ុយក្រែនប្រមាណ២២០០០នាក់ និងបានផ្តល់សម្ភារយោធា ក្នុងទំហំទឹកប្រាក់ ជិត៣លានដុល្លារ។ លើសពីនេះ នៅសប្តាហ៍មុន អង់គ្លេសបានបញ្ជូនអាវុធប្រឆាំងរថពាសដែកទៅឱ្យទីក្រុងកៀវ ដើម្បីពង្រឹងសមត្ថភាពការពារជាតិ។ 

 

មិនតែប៉ុណ្ណោះ លោកចនសុន បានប្រកាសផ្តល់មូលនិធិក្នុងទំហំទឹកប្រាក់១២០លានដុល្លារ ដើម្បីគាំទ្រអភិបាលកិច្ចល្អ និងលើវិស័យថាមពលនៅអ៊ុយក្រែន។ លោកនាយករដ្ឋមន្រ្តី បានចាត់ទុកមូលនិធិមួយនេះ នឹងជួយពង្រឹងសេរីភាព ជាមួយនឹងវិបុលភាពនៅក្នុងសង្គមអ៊ុយក្រែន។ 

 

ជាការឆ្លើយតប មេដឹកនាំអ៊ុយក្រែន បានជំរុញឱ្យប្រទេសលោកខាងលិចដាក់ទណ្ឌកម្មលើរុស្ស៊ី ក្នុងពេលនេះជាជាងរង់ចាំរហូតដល់រុស្ស៊ីឈ្លានពាន។ លោកប្រធានាធិបតី ក៏បានអំពាវនាវឱ្យរុស្ស៊ី ដកទ័ពចេញពីតំបន់ក្បែរព្រំដែនរបស់ខ្លួន។ 

 

ជំនួបជាន់ខ្ពស់នេះ ធ្វើឡើងបន្ទាប់ពីលោកប្រធានាធិបតីរុស្ស៊ី វ៉្លាឌីមៀ ពូទីន ចោទអាម៉េរិកថា ព្រងើយចំពោះសំណើរុស្ស៊ី និងចង់ឱ្យអ៊ុយក្រែនចូលជាសមាជិកសម្ព័ន្ធយោធាណាតូ៕