ចិន តែងត្រូវបានបណ្តាប្រទេសលោកខាងលិច ចោទដដែលៗថា បានឃុំជនជាតិភាគតិចវីហ្គ័រ និងជនជាតិផ្សេងទៀត ប្រមាណ១លាននាក់ និងបានធ្វើទុកបុកម្នេញលើជនជាតិភាគតិចទាំងនោះ។ យ៉ាងណាមិញ ចិនបានបដិសេធ និងការពារថា ជនជាតិភាគតិច ត្រូវបានបង្ហាត់បង្រៀនជំនាញឡើងវិញប៉ុណ្ណោះ ខណៈមនុស្សមួយចំនួន មានការងារហើយ។ 

 

ក្នុងសន្និសីទសារព័ត៌មានប្រចាំថ្ងៃនៅថ្ងៃទី៨ ខែកុម្ភៈ អ្នកនាំពាក្យក្រសួងការបរទេសចិន លោក Zhao Lijian ត្រូវបានអ្នកសារព័ត៌មានសួរពាក់ព័ន្ធនឹងអគ្គលេខាធិការអង្គការប្រជាជាតិដែល ជំរុញឱ្យចិនទទួលប្រមុខសិទ្ធិមនុស្សUN មកចិន។ 

 

«ចិនទទួលស្វាគមន៍ស្នងការសិទ្ធិមនុស្សអង្គការសហប្រជាជាតិ លោកស្រី Michelle Bachelet មកចិន រួមទាំងតំបន់ស៊ីនជាំង»។ លោក Zhao បានផ្តល់ចម្លើយបែបនេះ ដោយបន្ថែមថា ចិនបានអញ្ជើញប្រមុខសិទ្ធិមនុស្សអង្គការសហប្រជាជាតិមកចិនយូរហើយ និងភាគីទាំងពីរ ក៏បានទំនាក់ទំនងគ្នាលើបញ្ហានេះដែរ។ 

 

បើតាមមន្រ្តីចិន គោលបំណងនៃទស្សនកិច្ចរបស់លោកស្រី Bachelet ធ្វើឡើងដើម្បីលើកកម្ពស់ការផ្លាស់ប្ដូរទំនាក់ទំនងទៅមក និងកិច្ចសហប្រតិបត្តិការរវាងភាគីទាំងពីរ។ ក្នុងជំនួបជាមួយលោក ស៊ី ជិនភីង ប្រធានាធិបតីចិន ប្រមុខUN លោក អាន់តូនីញ៉ូ ហ្គូតេរ៉េស បានជំរុញឱ្យស្នងការសិទ្ធិមនុស្ស UN ធ្វើទស្សនកិច្ចទៅតំបន់ស៊ីនជាំង។ 

 

សូមបញ្ជាក់ថា ការស្នើឱ្យមានទស្សនកិច្ចរបស់លោកស្រី Bachelet មកតំបន់ស៊ីនជាំងមិនមែនជារឿងថ្មីឡើង។ កន្លងមក ប្រមុខការទូតចិន លោក វ៉ាង​ យី បានបញ្ជាក់យ៉ាងច្បាស់ថា ចិន នៅតែបើកទ្វាចាំទទួលប្រមុខសិទ្ធិមនុស្សអង្គការសហប្រជាជាតិមកតំបន់ស៊ីនជាំង។ ប៉ុន្តែគម្រោងនៃទស្សនកិច្ចនោះ មិនបានលេចជារូបរាងឡើយ៕