គេ សង្កេតឃើញថា គណបក្សភ្លើងទៀន ដែលធ្លាប់ល្បីឈ្មោះខ្លាំង និងធ្លាប់ជាគណបក្សប្រឆាំងដ៏ធំកាលពីមិនទាន់មានគណបក្សសង្គ្រោះជាតិ កំពុងប្រឹងប្រែងដើរលើកស្លាកគណបក្ស រួមទាំងខិតខំប្រមែលប្រមូលកម្លាំងអ្នកគាំឡើងវិញ។ បច្ចុប្បន្ន លោក ទាវ វណ្ណុល គឺជាប្រធានគណបក្សភ្លើងទៀន ប៉ុន្តែ អ្នកដែលហាក់ជាចេញមុខខ្លាំងជាងគេ គឺលោក ថាច់ សេដ្ឋា ដែលជាមន្រ្តីជាន់ខ្ពស់ និងជាអ្នកនាំពាក្យគណបក្សនេះទៅវិញ។ ថ្មីៗនេះ លោក រ៉ុង ឈុន ដែលជាមេសហជីពដ៏លេចធ្លោម្នាក់ បានប្រកាសគាំទ្រគណបក្សភ្លើងទៀន ហើយថែមទាំងអំពាវនាវឲ្យប្រជាពលរដ្ឋ ចូលរួមគាំទ្រដូចលោកដែរ។ 
 

ក្នុងចំណោមគណបក្សទាំង៤៤ តើគណបក្សណា ដែលអាចមានលទ្ធភាពប្រកួតប្រជែងជាមួយគណបក្សប្រជាជនកម្ពុជា? កាលពីបោះឆ្នោតជាតិឆ្នាំ២០១៨ គណបក្សប្រជាជនកម្ពុជា ទទួលបានអាសនៈទាំងអស់ក្នុងរដ្ឋសភា ដោយគណបក្សដទៃ ពុំទទួលបានអាសនៈឡើយ។ គណបក្សប្រជាជនកម្ពុជា មានឱកាសទទួលបានអាសនៈទាំងអស់ក្នុងរដ្ឋសភាបែបនេះ គឺដោយសារអវត្តមានអតីតគណបក្សសង្គ្រោះជាតិ៕