ក្នុងសភាជាន់ខ្ពស់នៅថ្ងៃទី១១ ខែកុម្ភៈ លោកGurbanguly Berdymukhamedov ប្រធានាធិបតីតួកម៉េនីស្ថាន បានលើកឡើងថា លោកបានសម្រេចចិត្តដ៏តឹងតែងមួយ ក្នុងការប្រគល់តំណែងទៅឱ្យមេដឹកនាំវ័យក្មេង ក្នុងការគ្រប់គ្រងប្រទេស។ អាណត្តិរបស់លោក Berdymukhamedov នឹងផុតនៅក្នុងឆ្នាំ ២០២៤។ 

 

បន្ទាប់ពីការប្រកាសនេះ គណៈកម្មការរៀបចំការបោះឆ្នោតតួកម៉េនីស្ថាន បានត្រៀមរៀបចំការបោះឆ្នោតប្រធានាធិបតីមុនពេលកំណត់ នៅថ្ងៃទី១២ ខែមីនាខាងមុខ។ «លោកប្រធានាធិបតី បានប្រាប់ការណែនាំដល់យើងឱ្យរៀបចំការបោះឆ្នោតប្រធានាធិបតីមុនពេលកំណត់»។ លោក Bezergen Garrayev អ្នកនាំពាក្យគណៈកម្មការរៀបចំការបោះឆ្នោត បានបញ្ជាក់បែបនេះ ក្នុងកិច្ចសម្ភាសជាមួយទីភ្នាក់ងារព័ត៌មាន AFP នៅថ្ងៃទី១២ ខែកុម្ភៈ។ 

 

ក្នុងការបោះឆ្នោតប្រធានាធិបតីនេះ កូនប្រុសលោកប្រធានាធិបតី លោក Serdar Berdymukhamedov ទំនងជាស្នងតំណែងឪពុក។ កន្លងមក លោក Serdar ដែលមានវ័យ ៤០ឆ្នាំ ត្រូវបានតែងតាំងជាមន្រ្តីទូត សមាជិកសភា រដ្ឋមន្រ្តី និងអភិបាលខេត្តជាដើម។ បច្ចុប្បន្ន លោក Serder មានតំណែងជាឧបនាយករដ្ឋមន្រ្តីគ្រប់គ្រងសេដ្ឋកិច្ចប្រទេស។ ការរំពឹងលោក Serder ស្នងតំណែងឪពុកនេះ គឺដោយសារ បក្សប្រឆាំងមិនមានសម្លេងគាំទ្រច្រើនឡើយនៅតួកម៉េនីស្ថាន៕