ជុំវិញផែនការពង្រីកទីផ្សារស្រាផាសិនទៅក្រៅប្រទេស ម្ចាស់សហគ្រាសវ័យ ៣៥ឆ្នាំ មានសុដ្ឋិនិយមខ្លាំង ថាផលិតផលរបស់ខ្លួន នឹងទទួលបានជោគជ័យ ខណៈវាទទួលបានទទួលការពេញនិយមពីជនជាតិជប៉ុន កូរ៉េ និងរុស្ស៊ី ដែលរស់នៅ ប្រទេសកម្ពុជារួចទៅហើយ។ លោក សុភក្តិ ពន្យល់បន្ថែមដូច្នេះ៖«ខ្ញុំមើលឃើញពីសន្ទុះគាំទ្ររបស់ជនជាតិទាំង៣ ច្រើនជាងជនជាតិដទៃ។ ភ្ញៀវជប៉ុនមក១០នាក់ គឺមានភ្ញៀវ៩នាក់ទិញ ហើយគាត់នាំគ្នាគាត់ មកទិញទៀត។ ជនជាតិកូរ៉េវិញ ចូលចិត្តខ្លាំងមែនទែន បន្ទាប់ពីជប៉ុន ហើយលេខ៣ គឺរុស្ស៉ី។ កាលរុស្ស៉ី នៅកំពត និងព្រះសីហនុច្រើន គឺគាត់កម្មង់រហូត។ (ជនជាតិ)រុស្ស៊ី ភ្លក់១០(នាក់)  គឺទិញទាំង១០(នាក់)»។


ស្រាផាសិនមណ្ឌលគិរី ពណ៌ក្រហមដែលមានកម្រិតជាត~១៣.៥ ដឺក្រេ។ រូបភាពពីហ្វេសប៊ុកលោក ប៊ូ សុភក្តិ
 

តាមពិតទៅ លោក មានគម្រោងពង្រីកទីផ្សារនេះ តាំងពីឆ្ននាំ២០២០ម្ល៉េះ ប៉ុន្តែដោយសារការរាតត្បាតនៃជំងឺកូវីដ-១៩ ផែនការនេះក៏ត្រូវបានពន្យារពេល។ ដោយមើលឃើញថា ស្ថានភាពនៃជំងឺកូវីដ-១៩ បច្ចុប្បន្ន ហាក់បានធូរស្រាល ដែលវាសញ្ញាវិជ្ជមានមួយ សម្រាប់ការពង្រីកទីផ្សាររបស់ម្ចាស់សហគ្រាសរូបនេះ។
 

ទន្ទឹមនឹងគម្រោងពង្រីកទីផ្សារក្នុងឆ្នាំ២០២២នេះ លោក ប៊ូ សុភក្តិ ក៏កំពុងគិតពិចារណា លើដៃគូផ្គត់ផ្គង់វត្ថុធាតុដើមក្នុងស្រុក និងការស្វែងរកដៃគូចែកចាយនៅក្រៅប្រទេសដែរ ដើម្បីឱ្យដំណើរការពង្រីកទីផ្សារស្រាផាសិនរបស់ខ្លួន ទទួលបានជោគជ័យ។ «ការនាំចេញ យើងអត់ស្ទាក់ស្ទើរទេ ប៉ុន្តែដើម្បីនាំចេញបាន ទាល់តែយើងពង្រីកការផ្ទៃដីដាំដុះ។ សហគ្រាសខ្ញុំនៅតូច ហើយកាលណាធ្វើដល់៣ដំណាក់កាល គឺយើងរត់អត់រួចទេ។ ក្នុងដំណើរការផលិតកម្មមួយ គេមានដៃគូសហការគ្នា ដោយមាន ផ្នែកដាំដុះ ឬផ្គត់ផ្គង់វត្ថុធាតុដើម ផ្នែកផលិតកែច្នៃ និងផ្នែកទីផ្សារ។ នេះជាអ្វីដែលយើងពិចារណា»។
 

សព្វថ្ងៃនេះ លោក ប៊ូ សុភក្តិ ប្រមូលផលផ្លែផាសិនពីចម្ការទំហំ១ហិកតារបស់ខ្លួន ដែលមានទីតាំងនៅភូមិពូលូ ឃុំដាក់ដាំ ស្រុកអូរាំង និងប្រមូលទិញពីកសិករនៅតំបន់ជុំវិញ ក្នុងបរិមាណ ១០០គីឡូ ទៅ៣០០គីឡូក្រាម ដើម្បីយកមកចម្រាញ់ជាស្រា។ ប្រសិនបើគម្រោងពង្រីកទីផ្សារទៅក្រៅប្រទេស មានដំណើរការវិជ្ជមាន នោះការពង្រីកការដាំដុះផ្លែផាសិនរបស់ម្ចាស់សហគ្រាសរូបនេះ ក៏ត្រូវពង្រីកដែរ៕