លោក បានសរសេរលើទំព័រហ្វេសប៊ុកថា ថ្វីបើអំណោយរបស់លោក មានចំនួនតិចតួចក្តី តែជាសក្ខីកម្មនៃមនោសញ្ចេតនា និងទឹកចិត្តមនុស្សធម៌របស់លោក ដែលនៅជាប់ជាមួយប្រជាជនជានិច្ច។ បន្ថែមពីនេះ ប្រធានអតីតគណបក្សប្រឆាំង បានធ្វើសេចក្តីប្រាថ្នាក្នុងចិត្តដូច្នេះថា៖«ក្នុងឱកាសនេះដែរ ខ្ញុំសូមឲ្យទឹកចិត្តនៃក្តីមេត្តា ដែលជាគុណធម៌ដ៏ប្រពៃ កើតមានដល់មនុស្សលោក ជាពិសេសមានដល់អ្នកដឹកនាំទាំងឡាយ ដើម្បីនាំមកនូវសេចក្តីសុខ សន្តិភាពពិត ជូនប្រជាជាតិរៀងៗខ្លួន និងពិភពលោក»។ 

 

នៅព្រឹកថ្ងៃស្អែក (១៦កុម្ភៈ) លោក កឹម សុខា ដែលអ្នកគាំទ្រខ្លះរបស់លោក ចាត់ទុកជាអ្នកនយោបាយអហិង្សា នឹងបន្តឡើងសវនាការ។ លោក ត្រូវបានចោទប្រកាន់ពីបទគប់គិតជាមួយបរទេស (សន្ទិដ្ឋភាព) ដើម្បីផ្តួលរំលំរដ្ឋាភិបាលកម្ពុជា ចាប់តាំងពីខែកញ្ញា ឆ្នាំ២០១៧មក។ ក្រោយការចាប់ខ្លួន និងការចោទប្រកាន់លោកបាន២-៣ខែ ពោលគឺនៅខែវិច្ឆិកា ឆ្នាំ២០១៧ គណបក្សសង្គ្រោះជាតិ ដែលជាអតីតគណបក្សប្រឆាំងធំជាងគេ និងជាដៃគូប្រជែងរបស់គណបក្សកាន់អំណាច ក៏ត្រូវបានតុលាការកំពូលរំលាយចោល ក្រោមហេតុផលថា មេដឹកនាំរបស់ខ្លួន ជាប់ពាក់ព័ន្ធនឹងអំពើក្បត់ជាតិ៕