រដ្ឋដើរតួនាទីសំខាន់ក្នុងជួយគាំពារសង្គម ហើយសង្គមស៊ីវិលក៏ជាតួអង្គចូលរួមចំណែកយ៉ាងសកម្មដែរ ក្នុងការពាំនាំតម្រូវការនិងជួយសម្របសម្រួលដល់ពលរដ្ឋតាមសហគមន៍ ឲ្យទទួលបានកិច្ចគាំពារ។ តំណាងឲ្យក្រុមងាយរងគ្រោះ អង្គការអុកស្វាម ស្នើឲ្យរដ្ឋាភិបាលបន្តជួយ និងចែងគោលនយោបាយបន្ថែមពួកគេ។ 

 

ក្នុងកិច្ចសម្ភាសន៍ជាមួយ សារព័ត៌មានថ្មីៗ លោកស្រី ភាណ សោភ័ណ នាយិកាអង្គការអុកស្វាមប្រចាំកម្ពុជា បានលើកឡើងថា កិច្ចគាំពារសង្គម គឺជាសិទ្ធិមនុស្ស សម្រាបជួយឲ្យពលរដ្ឋរស់នៅ​បានសមរម្យ។ ជាក់ស្ដែង ពលរដ្ឋគ្រប់រូបសុទ្ធបានចូលរួមលើស្ទួយចរន្តសេដ្ឋកិច្ចនិងសង្គម តាមការបង់ពន្ធជូនរដ្ឋ ដោយផ្ទាល់ ឬប្រយោល។ ប៉ុន្តែ ក្រុមសេដ្ឋកិច្ចក្រៅប្រព័ន្ធនិងជនចាស់ជរា ពុំទាន់ទទួលបានសិទ្ធិគាំពារពេញលេញនៅឡើយទេ។ 

 

ការបើតាមការមើលឃើញរបស់ នាយិកាអង្គការអុកស្វាម ដោយបន្ថែមថា នាតំណាក់កាលនេះ កម្ពុជាគួរតែមានកិច្ចគាំពារសង្គមដ៏រឹងមាំ ស្របពេលដែលសេដ្ឋកិច្ចកំពុងរីកដុះដាល។ កិច្ចការនេះ ត្រូវមានបរិយាបន្ន និងប្រកបដោយសមធម៌ ដោយផ្អែកតាមសិទ្ធិ និងឆ្លើយតបតាមគោលការយេនឌ័រ។  
 

 

«ក្នុងបរិបទកូវីដ-១៩ ជនងាយរងគ្រោះ បានរងគ្រោះបន្ថែមទៀត បើរដ្ឋាភិបាលពុំបានឆ្លើយតបជួយគាំពារដល់ពួកគេ»។ នេះជាការព្រួយបារម្ភរបស់អង្គការអុកស្វាម ហើយចំណុចគួរឲ្យកត់សម្គាល់នោះ គឺរដ្ឋាភិបាលបានយកចិត្តទុកដាក់ខ្ពស់លើពលរដ្ឋនៅក្រោមបន្ទាត់ភាពក្រីក្រ រួមទាំងអ្នកបាត់បងការងាផងដែរ។ 

 

ក្នុងនាមជាសង្គមស៊ីវិល អង្គការ អុកស្វាម កំពុងផ្ដោតលើកិច្ចការងារសំខាន់ចំនួនបី គឺការលើកកម្ពស់ភាពអង្គអាចផ្នែកសេដ្ឋកិច្ចស្រី្ត អភិបាលកិច្ចធនធានធម្មជាតិ និងកិច្ចគាំពារសង្គម។ លោកស្រី សោភ័ណ បានឲ្យដឹងថា៖ «ជាអង្គការសង្គមស៊ីវិល យើងដើរតួនាទីជាអ្នកតំណាងពលរដ្ឋ ឲ្យសំឡេងឬតម្រូវការគាត់បានឭនិងទៅដល់រដ្ឋាភិបាល»។ លោកស្រី បន្តថាជនងាយរងគ្រោះ ដូចជាប្រកបមុខរបរសេដ្ឋកិច្ចក្រៅប្រព័ន្ធ មានកម្មករសំណង់ អ្នកធ្វើការផ្នែកប្រើសេវាតាមតំបន់ទេសចរណ៍និងកន្លែងកម្សាន្ត មិនទាន់អត្ថប្រយោជន៍នៅឡើយទេ។ បញ្ហានេះ កើតឡើងដោយសារកន្លែងការងាររបស់ពួកគេខ្លះមិនបានចុះបញ្ជី ហើយរដ្ឋក៏មិនទាន់ទទួលស្គាល់ ឬចែកគោលនយោបាយសម្រាប់ពួកគេ។ 

 

 

គោលនយោបាយរបស់រដ្ឋាភិបាល ថ្វីត្បិតតែបានយកចិត្តទុកដាក់ ប៉ុន្តែការគាំទ្រនៅមានកម្រិតទាប។ តាមការពិនិត្យ ពលរដ្ឋដែលរស់នៅក្រោមបន្ទាត់ក្រីក្រ មានប័ណ្ណក្រីក្រដោយទទួលសេវាសុខភាពឥតគិតថ្លៃ។ ប៉ុន្តែ អ្នកនៅក្បែរបន្ទាត់ក្រីក្រ ដែលភាគច្រើនជាអ្នកសេដ្ឋកិច្ចក្រៅប្រព័ន្ធ ពុំទទួលបានសេវាសង្គមដែលរដ្ឋាភិបាលកំពុងផ្ដល់ឲ្យនៅឡើយទេ។ 

 

ក្នុងសប្ដាហ៍នៃកិច្ចគាំពារសង្គមឆ្នាំ២០២២នេះ នាយិកាអង្គការអុកស្វាមប្រចាំកម្ពុជាបានស្នើទៅរដ្ឋាភិបាលយ៉ាងដូច្នេះ៖ «ក្នុងនាមអង្គការអុកស្វាម ក៏ដូចជាតំណាងសំឡេងប្រជាពលរដ្ឋដែលត្រូវការកិច្ចគាំពារសង្គម សុំសូមពរឲ្យរដ្ឋាភិបាលជួយជំរុញឲ្យមានការទទួលស្គាល់ និងដាក់បញ្ចូលកម្មករសេដ្ឋកិច្ចក្រៅប្រព័ន្ធ ពិសេសយុវជននិងស្រី្ត ក្នុងគោលនយោបាយជាតិគាំពារសង្គម ច្បាប់​ស្តីពី​ប្រព័ន្ធ​គាំពារ​សង្គម និងច្បាប់របរសន្តិសុខសង្គម»។ លោកស្រីអះអាងថា ការបញ្ចូលក្នុងគោលនយោបាយនិងច្បាប់ទាំងនេះ នឹងជួយឲ្យពួកគេមានសិទ្ធិពេញលេញ ទទួលបានកិច្ចគាំពារពីរដ្ឋាភិបាល និងអ្នកមានតួនាទីទទួលខុសត្រូវផ្សេងទៀត។ 

 

ជាមួយគ្នាដែរ នាយិកាអង្គការអុកស្វាមប្រចាំកម្ពុជា ស្នើឲ្យរដ្ឋាភិបាលផ្ដោតសំខាន់លើកិច្ចគាំពារដល់ស្រី្ត មានវិសមភាពការងារ រួមទាំងយកចិត្តទុកដាក់​ស្រី្តអំឡុពេលមានផ្ទៃពោះ និងក្រោយពេលសម្រាល។ ចំណុច សំខាន់មួយទៀត គឺការបង្កើនទំហំថវិកា ក្នុងកិច្ចប្រព័ន្ធគាំពារសង្គម និងជំនួយសង្គម ដើម្បីឆ្លើយតបនឹងគ្រោះមហន្តរាយ ពិសេសដល់ជនចាស់ជរា ស្ត្រី កុមារ និងជនពិការភាព៕