កីឡាជាតិ
ជាតិ
ណាហ្គាខបប្រកួតជាមួយម្ចាស់ផ្ទះ Chainat FC នាវេលាម៉ោង៥ល្ងាចនេះ
× បាងកក៖ នាវេលាម៉ោង៥ល្ងាចនេះ ក្លិបណាហ្គាខបនឹងត្រូវប្រកួតមិត្តភាពជាមួយក្លិប Chainat FC ដែលបានបញ្ចប់ក្នុងចំណាត់ថ្នាក់លេខ១០នៃក្របខណ្ឌ Thai Premier League កាលពីរដូវកាលមុន។ នេះជាការប្រកួតដកស្រង់បច្ចេកទេសលើកទីពីររបស់ម្ចាស់ការពារតំណែងជើងឯកពានរង្វាន់សម្តេច ហ៊ុន សែន ឆ្នាំ២០១៣ នៅក្នុងប្រទេសថៃ បន្ទាប់ពីពួកគេបានប្រកួតចាញ់ក្រុមឈុតទីពីររបស់ BEC Tero Sansana FC ក្នុងលទ្ធផល ៤-១ កាលពីថ្ងៃពុធ កន្លងមក។
ការប្រកួតនឹងត្រូវប្រព្រឹត្តទៅនៅលើទីលាន Khao Plong Stadium នៃខេត្ត Chainat ដែលមានចម្ងាយប្រមាណ២០០គីឡូម៉ែត្រ ខាងជើងក្រុងបាងកក។ Chainat FC ដែលមានរហ្សសនាមថា «កេងកង» ស្ថិតក្រោមការដឹកនាំបង្វឹករបស់លោក Surachai Jaturapattarapong អតីតខ្សែបម្រើប្រយុទ្ធដ៏ឆ្នើមរបស់ជម្រើសជាតិថៃ។
សម្រាប់ការប្រកួតនេះ លោក ប្រាក់ សុវណ្ណារ៉ា ទីប្រឹក្សាបច្ចេកទេស និងជាអ្នកទទួលខុសត្រូវដឹកនាំបង្វឹកបណ្តោះអាសន្នរបស់ក្លិបណាហ្គាខប នឹងផ្តល់ឱកាសឲ្យកីឡាករបរទេស៤រូប ដែលមាន កូរ៉េខាងត្បូង២រូប ជប៉ុន១រូប និងហ្គីណេ១រូប ក្នុងការបង្ហាញសមត្ថភាពជាលើកទីពីរ។ ពួកគេទំនងក្លាយជាសមាជិកថ្មីរបស់ណាហ្គាខបសម្រាប់យុទ្ធនាការមិត្តហ្វូនខេមបូឌានលីកនាពេលខាងមុខ។
កីឡាករវ័យក្មេងមួយចំនួនរបស់ណាហ្គាខបក៏នឹងអាចដាក់ឲ្យលេងផងដែរ ដែលជាផ្នែកមួយនៃការត្រៀមប្រកួតដើម្បីការពារតំណែងជើងឯកពានរង្វាន់សម្តេច ហ៊ុន សែនរបស់ណាហ្គាខប៕
© រក្សាសិទ្ធិដោយ thmeythmey.com